Қостанай облысына жұмыс сапары жайында

            Қостанай облысында Мемлекет басшысымен бірге егін жинау науқанының барысымен таныстық. Президентке егін жинау науқанының соңғы кезеңі туралы ақпарат берілді. Бүгінгі күні облыста 3,1 млн га астық бастырылды, немесе пайыздық көрсеткішпен 76% құрайды. Әр гектардан 10 центнерден өнім алынуда. Егін жинау жұмыстарына 9 100 комбайн техникасы жұмылдырылған. Дәнді дақылдарды жинау жұмыстары жақын арада аяқталуы тиіс. Сондай-ақ, Мемлекет басшысына мал шаруашылығын дамыту, агроөнеркәсіптік кешенді цифрландыру, ауылшаруашылық техникасы саласындағы өндіріс жобаларын іске асыру туралы айтылды.

            Өңір шаруалармен өткен кездесу барысында Қасым-Жомарт Тоқаев аграрлық сектордың табысты дамуы республиканың бүкіл экономикасының бәсекеге қабілеттілігін айқындайтынын атап өтті. "Қостанай облысының экономикасы жақсы дамып келеді. Болашақта облыста бәрі жақсы болады деп ойлаймын. Біздің алдымызда маңызды міндеттер тұр, біздің экономикамыз пандемия салдарына төтеп бере алды. Биылғы жылы жақсы өнім бар екені көрініп тұр", - деп атап өтті Президент.

            Мемлекет басшысы өңірдің шаруаларына елдің азық-түлік қорын қамтамасыз ету шаралары үшін алғыс айтып, егін жинауды уақтылы аяқтап, жақсы өнім жинауға тілектестік білдірді.

            Сондай-ақ, Қасым - Жомарт Тоқаев балмұздақ және қышқыл сүт өнімдерін өндіретін танымал "Милх" ЖШС-нің өндірістік желілерін аралап көрді.

• 11.09.2020
• 342