Еліміз үшін Өзбекстан өңірдегі маңызды стратегиялық серіктес мемлекет.

Бауырлас елдердің Мемлекет басшылары өзара сауда мен тауар алмасуда, инвестициялық белсенділікті арттыруда экономикалық әріптестікті сапалы жаңа деңгейге шығаруды тапсырған-ды.

Шымкент трансшекаралық аймақтағы қуатты мегаполис. Тиімді мемлекетаралық байланыстардың нәтижесінде өңірімізде кең ауқымды экономикалық мүмкіндіктер ашылды.

Түбі бір түркі жұртының орталығы Түркістанда Қазақстан мен Өзбекстан арасындағы ІІІ өңіраралық ынтымақтастық форумы өтті. Қос елдің іскерлік ортасы кездескен алғашқы күні Шымкент қаласы мен өзбекстандық кәсіпкерлер арасында 240 млн. АҚШ долларын құрайтын 6 инвестициялық жобаны бірлесе іске асыруға келісім жасалды.

Өзбекстандық бизнес өкілдері қаламыздың құрылыс нарығына өз үлесін қоспақ. Индустриялық салада керамикалық құрылыс материалдары, шыны ыдыстар, сұйық дәрілерге арналған ампулалар, картон және қағаз өндірістері жолға қойылады.

Трансшекаралық ынтымақтастық, экономикалық интеграция мәселелерін қамтитын мұндай кездесулер Орталық Азия кеңістігіндегі екі ірі мемлекеттің нарығына өзара капитал енгізу мүмкіндіктерін кеңейтіп, стратегиялық әріптестіктің жаңа сипат алуына ықпал етеді деген сенімдемін.

• 02.12.2021
• 224