Шымкент қаласы мен Түркия Республикасының Адана қаласы арасындағы бауырластық келісім-шартқа қол қою рәсімі өтті

Шымкенттің республикалық дәрежедегі қалаға айналуы сыртқы экономикалық және мәдени-гуманитарлық ықпалдастық пен ынтымақтастықты жолға қоюға мүмкіндік ашты.

Бауырлас елдер – Қазақстан Республикасы мен Түркия Республикасын ерекше қарым-қатынастар байланыстыруда. Достық пейілдегі әріптестік түбі бір туыс мемлекеттердің өңіраралық серіктестігімен жалғасын табуда.

Бүгін Шымкент қаласы мен Түркия Республикасының Адана қаласы арасындағы бауырластық келісім-шартқа қол қою рәсімі өтті. Онлайн режимде әріптесім Зейдан Каралар мырзамен қос қаланың өзара ынтымақтастығын арттыру мәселелерін талқыладық.

Біз Шымкент пен Адана арасындағы бауырластықты арттыруға арналған жұмысымызды бастауға келістік және сауда-экономикалық, өнеркәсіптік, туризм, мәдени байланыстарды арттыруға мүдделі екенімізді нықтадық.

Қаламызда түркиялық кәсіпкерлермен байланыстардың оң тәжірибесі бар. Түрік инвесторларымен бірлесе жеңіл өнеркәсіп, құрылыс индустриясы, азық-түлік өндірісі салаларында 55 млн. АҚШ долларына тең келетін 6 жоба табысты іске асырылуда. 230 млн. АҚШ долларын құрайтын тағы 4 жоба жүзеге аспақ.

Шымкенттің бауырлас қалаларының санатында 9 қала болса, оның ішінде Түркия Республикасының Измир және Эскишехир қалалары бар. Көлемі жөнінен Адана Түркияның төртінші қаласы саналады, алатын орны мен экономикалық құрылымы Шымкент қаласымен деңгейлес.

Қалаларымыздың өзара ұқсас болуы Шымкент пен Адана арасындағы бауырластықты орнықтыруға, серпілісті ықпалдастықты арттыруға мол мүмкіндік береді деген сенімдемін.

• 02.12.2021
• 228