Шығыс Қазақстандағы экологиялық проблемаларды шешуге бірге күш саламыз

Өткен Zoom-конференцияда Шығыс Қазақстан облысының тұрғындарына өңірдегі экологиялық проблемаларды шешудің Жол картасының жобасы (драфт) таныстырылды.

Жол картасы бойынша алдағы жылдарға Риддер металлургиялық кешенінде атмосфералық сілтісіздендіру цехын салу, өндіріс орындарынан ауаға шыққан қалдыққа мониторинг жасаудың автоматтандырылған жүйесін енгізу, жеке секторды орталық жылумен жабдықтау жүйесіне қосу, облыс қалаларында ластаушы заттарға сараптама жасайтын заманауи зертханалар салу, ағаш отырғызу көлемін арттыру секілді 30-ға жуық іс-шара жоспарланған.

Жергілікті халық қоршаған ортаның жағдайына байланысты істеліп жатқан жұмыстар туралы білуі тиіс. Сондықтан Жол картасын бірлесіп дайындауға шақырамын, біз барлық ұсыныстарды тыңдап, ескеруге дайынбыз. Жол картасы мазмұнды, жүзеге асатындай, бірақ амбициозды болуы керек. Өңірде проблемалар ондаған жылдар бойы жиналып қалғанын білесіздер. Сондықтан олар бірден шешіле қоймайды. Дегенмен өндірістік өңірдегі қоршаған ортаның жағдайын жақсарту үшін бар күшті салуымыз қажет.
Жол картасы ұсыныстар қабылданғаннан кейін қоғам өкілдеріне қайта таныстырылады.
Онлайн-кездесуде эко-белсенділер мен ғалымдар атмосфералық ауаның ластануы, оған қатысты қабылданып жатқан шаралар туралы сұрақтар қойды. Пікірлерін ортаға салды. Экологиялық мониторинг посттарының санын көбейтуді сұрады. Экологиялық кодексте нақты қадамдар көрсетілгенімен, өңірдегі қоршаған орта жағдайын реттеу бойынша жылдамырақ әрекет қажет.

Еуропа «Ең озық қолжетімді технологиялар» (ЕОҚТ) арқылы экологиялық ахуалды жақсартуға 15 жыл жұмсағанын білеміз. Біз Экологиялық кодексте бұл мерзімді де ескердік. Бірақ жылдар бойы күтіп, қарап отыра алмаймыз. Барынша тезірек әрекет етуіміз керек. Халықпен, жергілікті атқарушы орган өкілдерімен бас қосып отырғанымыз да сол.

Өткен жылы өндіріс орындарынан табиғатты ластағаны үшін жиналған эмиссия 90 млрд теңгедей болды. Оның 40 млрд-ы елдегі экологиялық жағдайды жақсарту шараларына бағытталған.

• 11.09.2020
• 490