С. Шәпкенов қазақстандықтарды Тәуелсіздіктің 30 жылдығымен құттықтады

«Биыл біз өте маңызды тарихи оқиғаны – Қазақстанның егемендік алғанына 30 жыл толуын атап өтеміз.

Тәуелсіздік – біздің ата-бабаларымыз ежелден бері армандаған асыл мұрат. Егемендік алған Қазақстан өзінің мемлекеттік рәміздерін және төл  валютасын енгізді, негізгі заңымыз  – Конституциямыз қабылданып,  еліміз демократиялық, зайырлы, құқықтық және әлеуметтік мемлекет болып жарияланды, даңғыл даму жолына түсті.

Тәуелсіздіктің алғашқы жылдарында тұтас дәуірдің куәгері болған туған халқымыз айтарлықтай қиындықтарды бастан кешірген еді, өйткені бұрынғы Одақ кезіндегі сауда-экономикалық байланыстардың үзілуінен көптеген кәсіпорындардың жұмысы тоқтады, жалақы бойынша берешек пен жұмыссыздық деңгейі өсті, халықтың табысы төмендеді.

Алайда, осыған қарамастан, мемлекет ұзақ мерзімді әлеуметтік басымдықтарды айқындады. Тәуелсіздік жылдарында әлеуметтік-еңбек саласында ауқымды жұмыстар атқарылды, барлық салалық заңдар, стратегиялық құжаттар мен мемлекеттік бағдарламалар қабылданды.

Әлеуметтік міндеттемелерді орындау және халықтың әл-ауқатын арттыру еліміздің әлеуметтік саясатының негізгі басымдықтары болып табылады. Осы жылдар ішінде әлеуметтік-еңбек саласын дамыту бойынша қабылданған шаралар мұқтаждық деңгейін 5,3%-ға дейін, жұмыссыздық деңгейін 4,9%-ға дейін төмендетуге ықпал етті.

Қазақстанда әл-ауқаттың өсуіне байланысты халық саны да тұрақты өсуде. Тәуелсіздік жылдары елімізге миллионнан астам отандасымыз оралды, жыл сайын республикада 400 мыңнан астам бала дүниеге келеді.

Ел егемендігі тұсындағы толағай табыстарымыз Елбасымыз - Тұңғыш Президентіміз Нұрсұлтан Әбішұлы Назарбаев іргесін қалап, қалыптастырған және қазіргі Мемлекет Басшысымыз Қазақстан Республикасының Президенті Қасым-Жомарт Тоқаев жалғастырып отырған көреген де дана, әлеуметтік бағдарланған саясаттың арқасында мүмкін болды. Халықтың әл-ауқаты әрқашан ел басшылығының ерекше назарында. Ал біздің басты мақсатымыз – ел Президенті алдымызға қойған барлық міндеттерді орындау.

Барша қазақстандықтарды Тәуелсіздік күнімен құттықтаймын! Отандастарымызға зор денсаулық, амандық пен бақыт, ал  туған елімізге одан әрі гүлдену тілеймін!

• 15.12.2021
• 335