ШЫМКЕНТТЕ 2,6 ТРЛН. ТЕҢГЕНІҢ ИНВЕСТИЦИЯЛЫҚ ЖОБАЛАРЫ ЖҮЗЕГЕ АСАДЫ

Шымкент қаласында инвестиция тартуға арналған бес жылдық жоспар бекітіліп, оның аясында 2,6 трлн. теңге болатын 282 жобаны іске асыру көзделген. Нәтижесінде 20 мың жаңа жұмыс орындары ашылмақ.  Ағымдағы жылдың 11 айында қалаға тартылған инвестиция көлемі өткен жылдың сәйкес кезеңімен салыстырғанда 55 пайызға артып, 392,4 млрд. теңгеден асты. 

Шаһар бюджетінің көлемі мегаполис болғалы 4 есеге артты. Ағымдағы жылдың басында қаланың бекітілген бюджеті 388 млрд. теңге болса, қазір оның көлемі 497 млрд. теңгеге жеткен немесе бір жылдың ішінде бюджет қоры 109 млрд. теңгеге ұлғайған. Қаржылық қордың 45 пайызы әлеуметтік салаға бағытталса, 25 пайызы даму жобаларына бөлінген.

Бюджет қаражатын ұлғайту арқылы қаладағы біршама өзекті мәселелер шешімін тауып келеді. Соның ішінде бюджетті жоспарлауда ашықтықты қамтамасыз етуде Мемлекет басшысы ұсынған «Халық қатысатын бюджет» жобасы жақсы тәжірибеге айналған. «Халық қатысатын бюджет» жобасын іске асыру аясында биылғы жылы 66 жобаға 1,3 млрд. теңге қаржы бөлінген. Бұл жұмыстар келесі жылы да жалғасын тауып, Президент тапсырмасына сәйкес абаттандыру және тұрғын үй-коммуналдық шаруашылығы бюджетіндегі «халық қатысатын» үлес 10 есеге артпақ.

• 20.12.2021
• 233