Кезекті кездесуім Қаратау ауданында өтті.

Тұран және Асар-2 шағынауданы тұрғындарымен кездесіп, өзекті мәселелерді талқыладық. Кездесуде шағынауданның белсенді азаматтары бүгінгі күні ең өзекті болып отырған инфрақұрылым мәселесін шешіп беруді сұрады.

Бүгінде Тұран шағынауданын ауыз сумен қамту бойынша жұмыстар толығымен аяқталып, тұрғындар сапалы ауыз суға қол жеткізді. Ал 3 кезеңнен тұратын кәріз жүйелерін жүргізудің қазір алғашқы кезеңінің құрылысы аяқталған, қалған кезеңдер бойынша жұмыстарды жыл соңына дейін аяқтауды жоспарлап отырмыз. Электр жарығымен қамту мақсатында құрылыс жұмыстары басталған, осы жылы пайдалануға беріледі. Табиғи газбен қамту бойынша мемлекеттік сатып алу конкурсы өткізілуде.

Сондай-ақ, соңғы уақытта тұрғындарды жиі мазалап жүрген көшелерді жарықтандыру, бағдаршамдар орнату, байланыс желілерін жүйелеу жөніндегі мәселелерді шешу үшін қажетті қаражаттың бөлінуін жетекші басшыларға тапсырғанмын.

Қаламыздың шалғай шығыс бөлігінде орналасқан Асар-2 елді мекен халқын толғандырып отырған басты мәселе - табиғи газ, электр жарығы және ауыз сумен қамтылмай қалған аумақтар жағдайы. Шағынауданды табиғи газбен толық қамту «АГРС-3» құрылысы аяқталысымен жүзеге асады. Электр қуатымен қамту бойынша құрылыс жұмыстары аяқталып, қазіргі уақытта абоненттеу жұмыстары атқарылуда. Тұрғындар жайлылығы үшін сапалы жол салып, кәріз жүйесін кіргізу үшін де жоспарлы жұмыстар жүргізілмек.

Кездесуде айтылған әрбір мәселенің оңтайлы шешілуі менің жіті бақылауымда болады және оған қажетті барлық жұмыстар жалғаса береді.

• 19.01.2022
• 179