Қаратөбе аумағының тұрғындарымен кездестім

Құрамы 5 тұрғын алаптан тұратын Қаратөбе аумағының тұрғындарымен кездестім.
Бұл елді мекен электр жарығымен, сумен, газбен толық қамтамасыз етілген. Олардың сапасын жақсарту бойынша жұмыстар жүргізілуде. Азаматтардың ұсыныс-тілектерін тыңдап, ағымдағы жылға арналған жоспармен жұмыс жобаларымен бөлістім. Жергілікті тұрғындар үшін өзекті мәселе болып табылатын су құбыры мен кәріз мәселесін бірге талқыладық.
24 мыңға жуық тұрғыны бар тұрғын алаптардың инженерлік жүйелермен қамтылу көрсеткіштері: ауыз сумен 94,4%, электрмен жабдықтау 96,5%, табиғи газбен 90,7%, кәріз жүйесімен 57% құрайды. Инфрақұрылымды жақсарту жұмыстары жүргізілуде. Ендігі мәселе – «Қаратөбе» аумағындағы жаңа құрылыс аумақтарын қамту.
Биыл ауыз су тарту және жеке меншік электр жүйелерін мемлекеттiк сапалы жүйелерге ауыстыру жұмыстары басталып, 2023 жылы пайдалануға беріледі. Кәріз жүйесі мен табиғи газ мәселесі 2025 жылға қарай толық шешімiн табатын болады. Ағымдағы жылы мемлекеттік-жекеменшік әріптестік аясында 6 көше жарықтандырылады, «Халық қатысатын бюджеті» жобасы аясында Қаратөбе аумағындағы елді мекендерді абаттандыру, сонымен қатар 23 шақырымға асфальт төсеу жоспарланған.
Еңбекші ауданына қарасты «Базарқақпа» тұрғын алабындағы апатты көпірдің жағдайымен таныстым. Бүгiнде тұрғын алаптағы «Сайрам-су» өзені арқылы салынған көпір су шаю салдарынан жарамсыз деп танылған. Кезінде тұрғындардың жүріп-тұруы үшін уақытша көпірді қайта құру туралы шешім қабылданған. Биыл нысан демеушілер есебінен толық жөндеуден өтеді. Осы сәтті пайдаланып, көпір құрылысын өз қаражатына жүргізуге дайын екендіктерін білдірген жеке демеушілерге алғысымды білдіремін. Ал, өз тарапымыздан аталған жұмыстарды үйлестіру бағытын қолға аламыз.
Тұрғындармен кездесу қорытындысы бойынша тиісті басқармаларға нақты тапсырмалар бердім. Олардың ішінде: жол құрылысы кезінде бақылауды күшейтуді және жобалық-сметалық құжаттаманы қатаң сақтауды тапсырдым. Сонымен қатар, жер мәселесі бойынша бірқатар тапсырмаларды бердім.
Жалпы, Еңбекші ауданы бойынша 2022 жылы 2372 абонентті жаңадан салынған үйлерге ауыз сумен қамту жоспарлануда. Тиісті жобалық-сметалық құжаттама дайын.Жуық арада тиісті жұмыстар басталады. Ауданда 2023 жылға дейін сумен және электрмен жабдықтау көрсеткіші 100 пайызға, 2025 жылға дейін газбен қамту көрсеткіші 100 пайызға жеткізу жоспарлануда.

• 20.01.2022
• 188