Ақтауда азық-түлік тауарларының бағаларына мониторинг жүргізілді

Бүгін, 28 қаңтар күні Маңғыстау облысы кәсіпкерлік және сауда басқармасы мен «Халықтық бақылау» мониторингтік тобы Ақтау қаласы аумағында орналасқан ірі сауда нысандарындағы азық-түлік тауарларының бағаларына мониторинг жүргізді. Шара Мемлекет басшысы Қ.К. Тоқаевтың тапсырмасына сәйкес, тамақ өнімдері бағасының негізсіз өсірмеуін қадағалау мақсатында ұйымдастырылған, деп хабарлайды облыстың қоғамдық коммуникация орталығы.

Тексеріс барысында мамандар сауда орындарын, әлеуметтік маңызы бар азық-түлік тауарларының қоры сақталған қоймаларды аралап, азық-түлік бағасын тұрақтандыру үшін қолға алынған шараларды атап өтті.

-Әлеуметтік маңызы бар азық-түлік тауарларына бағаның негізсіз өсуіне жол бермеу бойынша облыс әкімі нақты тапсырма берді. Нәтижесінде өңірде барлығы 53 «Халықтық бақылау» мониторингтік тобы құрылған. Осы бағытта әкімдік бөлшек және көтерме сауда ұйымдарына түсіндіру жұмыстарын жүргізді. Сонымен қатар, азық-түлік бағасының өсу дерегіне жедел әрекет ету үшін қазір барлық қала, ауданда Сall-орталықтары жұмыс істейді. Бүгінде оған 23 өтінім келіп түскен, деді облыстық кәсіпкерлік және сауда басқармасының басшысы Жанна Тоқбаева.

Айта кетейік, өткен жылы Үкімет тапсырмасы бойынша облыс тұрғындары үшін Ақтау, Жаңаөзен қалаларында және аудан орталықтарында апта сайын ауыл шаруашылығы тауарларын өндірушілер мен көтерме сауда тауарларын жеткізушілердің 343 жәрмеңкесі өтті. Сондай-ақ, әкімдік пен ірі сауда ұйымдарының арасында 45 меморандум жасалды. 125 сауда нысанында азық-түлік тауарларын төмен бағамен сату үшін «Әлеуметтік бұрыштар» ұйымдастырылған. Аталған жұмыстар биыл да жалғасатын болады.

Бұдан бөлек, өңірлік тұрақтандыру қорын қалыптастыру үшін өткен жылы жергілікті бюджеттен 1 млрд. теңге берілді. Биыл тағы 1,5 млрд. теңге бөлу қарастырылған. Нәтижесінде өңірлік тұрақтандыру қорында тауарлардың 17 түрі бойынша 7032 тонна ӘМАТ қоры жасақталды.

• 31.01.2022
• 226