Атырауда азық-түлік бағаларының негізсіз өсуін болдырмау мақсатында мониторинг жүргізілуде

Облыс әкімдігінде «Әлеуметтік маңызы бар азық-түлік тауарларының бағаларын негізсіз өсіруіне жол бермеу» тақырыбында кеңес өтті, деп хабарлайды Атырау облысының өңірлік коммуникациялар қызметі.

Атырау облысы әкімінің бірінші орынбасары Серік Айдарбековтің төрағалығымен өткен кеңеске облыс әкімінің орынбасары Қайрат Нұрлыбаев, ауыл шаруашылығы басқармасы және бөлім басшылары, кәсіпкерлер мен селекторлық режимде аудан әкімдері қатысты.

Облыс әкімінің орынбасары Қайрат Нұрлыбаевтың айтуынша, 19 түрлі әлеуметтік маңызы бар азық-түлік тауарларының бағаларына апта сайын мониторинг жүргізіліп, қадағалануда.

- Бүгінде өңірде 19 түрлі тауардың бағасын тұрақтандырау мақсатында облыста тұрақтандыру қоры жұмыс жасайды. Тұрақтандыру қоры былтырғы жылдан бері қосымша 14 түрлі тауардың бағасын реттеуді қолға алды, - деді ол.

Сонымен қатар, тауар бағасының өсіп кетуі байқалса сатушыға ескерту беріліп, түсінік жұмыстары жүргізіледі. Себептері зерттеліп, негізсіз өсіру жағдайлары нақтыланады. Сөз байласып баға өсіру фактілері анықталған жағдайда, тиісті бақылаушы органдар тарапынан жауапкершілікке тарту шаралары қолға алынады.

Айта кетейік, тұрақтандыру қорының жұмыстары нәтижесінде Атырау қаласында 1 сортты нан бағасын тұрақты ұстауға қол жеткізіліп отыр. Облыста 60-тан астам сауда нүктесі бар “Дәулет нан” ЖШС арқылы 1 сортты нан бағасы 90 теңгеден аспауда.

Жиын соңында басқарма басшылары мен аудан әкімдеріне бірқатар тапсырмалар міндеттелді.

Атырау қаласы мен аудандарда апта сайын өтетін ауыл шарушылығы өнімдері жәрмеңкелерін қайта жандандыру, әлеуметтік маңызы бар азық-түлік сататын кәсіпкерлерге баға өсірмеу, облыста бар көкөніс қоймаларын тиімді пайдалану және қойма салу жұмыстарын ұйымдастыру тапсырылды.

• 10.02.2022
• 203