Сауда конфигурациясындағы Комитет - Қазақстан мен ЕО арасындағы сауда қатынастарын дамыту үшін тиімді диалог алаңы

10 наурызда Брюссельде "Қазақстан Республикасы – Еуропалық Одақ" Ынтымақтастық комитетінің сауда конфигурациясындағы 5-ші отырысы өтті.

Естеріңізге сала кетейік, сауда конфигурациясындағы Комитет сауда-экономикалық және инвестициялық ынтымақтастықты кеңейту мақсатында Қазақстан мен ЕО-ның кеңейтілген серіктестігі мен ынтымақтастығы туралы келісімді іске асыру үшін құрылған.

Қазақстандық делегацияны Қазақстанның Сауда және интеграция вице-министрі Қайрат Төребаев, еуропалық делегацияны – "Оңтүстік көршілер, Таяу Шығыс, Түркия, Ресей және Орталық Азия" тобы басшысының орынбасары, Еуропалық Комиссияның сауда жөніндегі Бас Директораты Тимо Хаммарен басқарды.

Екі тарап Комитеттің Қазақстан мен ЕО арасындағы сауда-экономикалық ынтымақтастықтың стратегиялық маңызды салаларын талқылау және одан әрі іске асыру үшін тиімді диалог алаңы болып табылатынын растады.

Комитет отырысы барысында сауда-инвестициялық ынтымақтастық, ҚР-ЕО Кеңейтілген серіктестігі мен ынтымақтастығы туралы келісімнің сауда бөлімін іске асыру барысы, Central Asia Investment Program және Ready4Trade Central Asia жобаларын іске асыру, санитарлық және фитосанитарлық шаралар, өнеркәсіптік гранттар, мемлекеттік сатып алулар, Қазақстанды сұр тізімнен шығару, сондай-ақ ДСҰ-ның соңғы оқиғалары мәселелері талқыланды.

5-ші отырыс шеңберінде Вице-министр Қ. Төребаевтың Еуропалық Комиссияның сауда жөніндегі бас директоратындағы өкілімен, AWEX сауда және инвестицияларға жәрдемдесу жөніндегі агенттігінің басшылығымен және Брюссельдің сауда-өнеркәсіп палатасымен кездесулері өтті.

ЕО Қазақстан Республикасының сауда және инвестициялар саласындағы негізгі әріптестерінің бірі болып табылады. Бүгінде ЕО елдерімен сауда Қазақстанның жалпы тауар айналымының үштен бір бөлігін алып отыр. Бұл ретте, қазақстандық экспорттың 38,5% - ы ЕО елдеріне тиесілі.

2021 жылы ҚР мен ЕО елдерінің тауар айналымы 21,4% - ға артып, $28,9 млрд құрды, экспорт $23,3 млрд, импорт $5,7 млрд құрады.

Сауданың оң серпінін сақтау және жеткізілетін тауарлар мен қызметтер номенклатурасын кеңейту мақсатында Қазақстан өңдеу өнеркәсібінің әртүрлі өнімдерінің шамамен 140 атауының экспортын $1,5 млрд-тан астам ұлғайту есебінен ЕО-мен өзара сауда көлемін ұлғайта алады.

• 14.03.2022
• 223