Мәскеуде Еуразиялық экономикалық комиссия кеңесінің кезекті отырысы өтті

Қазақстандық делегацияны Премьер-Министрдің орынбасары-Сауда және интеграция министрі Бақыт Сұлтанов басқарды.

ЕЭК Кеңесі 30-дан астам мәселені қарады.

Олардың қатарында тұтынушылардың құқықтарын қорғау, өзара сауда, ЕАЭО-ның интеграцияланған ақпараттық жүйесінің жұмыс істеуі бөлігіндегі ЕАЭО-ға мүше мемлекеттердің ынтымақтастығы мәселелері бар. ЕАЭО-ға мүше мемлекеттерде ғылыми дәрежелерді өзара тану туралы келісім мақұлданды.

Сонымен бірге, Кеңес аясында 2024 жылдың соңына дейін балық өсіру кәсіпорындары үшін жас форель мен лососьқа, сондай-ақ целлюлозаның жекелеген түрлеріне қатысты бір жылға нөлдік импорттық баж салығын белгілеу туралы шешім қабылданды. Бұдан басқа, Кеңес Қазақстанда жылу бөлгіш құрамаларды өндіру үшін қажетті құрауыштарды әкелуге жеңілдікті мақұлдады.

Кеңес отырысы барысында мемлекеттік сатып алу мақсаттары үшін тауарлардың шығарылған елін айқындаудың бірыңғай қағидалары қолданылатын тауарлар тізбесі кеңейтілді. Бұл отандық өндірушілерге Ресей Федерациясының мемлекеттік сатып алуларына жергілікті өндірушілермен тең дәрежеде қатысуға мүмкіндік береді. Сонымен қатар, ЕАЭО кедендік аумағына әкелінетін тауарлардың шығарылуын растау рәсімін оңайлату туралы шешім қабылданды.

Бұдан басқа, Кеңеске қатысушылар бірқатар азық-түлік тауарларын өндіру/тұтыну теңгерімдері және ЕАЭО ішкі нарығының тұрақтылығын сақтау үшін жеткізу шарттары туралы деректермен алмасуға келісті.

Қазақстанның бастамасы бойынша ЕАЭО шеңберінде «сұр» сертификаттарды таратуға қарсы іс-қимыл туралы мәселе қаралды. Қазақстан ұсынған шараларды іске асыру тауарлардың қауіпсіздігі мен сапасын арттырады, авариялылықты төмендетеді, нарықты қауіпті тауарлардан қорғайды, бірыңғай қағидалар бойынша өндірушілердің адал бәсекелестігін дамытуға және ЕАЭО елдерінің зертханалық базаларын дамыту үшін жағдайлар жасауға бағытталған.

Сонымен қоса, тараптар ЕАЭО-ға мүше мемлекеттер экономикаларының орнықтылығын арттыру және макроэкономикалық тұрақтылықты қамтамасыз ету жөніндегі шаралар жоспарын қабылдады.

• 25.03.2022
• 227