Бүгінде қазақстандық көлік саласы дамудың оң динамикасын көрсетіп отыр

🔷 Бүгінде қазақстандық көлік саласы дамудың оң динамикасын көрсетіп отыр. Саланың тәуелсіздік жылдарындағы басты жетістігі — ол Қазақстанның транзиттік әлеуеті мен өңірлік логистикалық хабы дамыған елге айналуы. Өйткені, көлік саласы — ел экономикасын дамытудың жетекші драйвері болып саналады.

Елімізде жүк тасымалы көлемінің өсімі сақталып отыр. Теміржол көлігімен жүк тасымалдау көлемі 10%-ға артып, 70,8 млн тоннаны құрады. Транзиттік жүктерді тасымалдау көлеміне келетін болсақ, ол да 20%-ға өсті. 2025 жылға дейін транзиттік тасымалдар көлемін 30 млн тоннаға дейін жеткізу жоспарланып отыр. Ол үшін теміржол инфрақұрылымын салу, жүктерді контейнерлеу және халықаралық дәліздерді дамыту бойынша шаралар қабылдануда.

🔹Біріншіден, транзиттік тасымалдар көлемін ұлғайтып, өткізу әлеуетін арттыру үшін «Достық-Мойынты», «Дарбаза - Мақтаарал» және «Алматы станциясының айналма теміржол желісі» сияқты 3 негізгі инфрақұрылымдық жобаны іске асыруды жоспарлап отырмыз. Соңғы жоба Алматы торабына түсетін жүктемені 30%-ға азайтып, жүктерді жеткізу уақытын 24 сағатқа дейін қысқартуға мүмкіндік береді.

🔹Екіншіден, отандық вагондарды сатып алуға несие беру кезінде вагон операторлары үшін сыйақы мөлшерлемесін 10%-ға дейін субсидиялау енгізілді. Бұл шара қазақстандық вагон жасау ісін қолдау мақсатында қабылданды.

🔹Үшіншіден, жүк тасымалдарын одан әрі дамыту мақсатында отандық электровоздарды (ALSTOM) және тепловоздарды (LKZ GE) сатып алғанда сыйақы мөлшерлемесін субсидиялау түрінде қолдауды заңнамалық түрде енгізуді ұсынамыз.

Отандық зауыттарға тоқталып кетсем, «Қазақстан Инжиниринг», KLMZ «Мэйкер», SMP Group (КВК) және FESCO заводтарының базасында отандық 20 және 40 футтық контейнерлер, сондай-ақ рулонды болат пен кен жүктеріне арналған контейнерлер өндірісі бойынша жұмыстар атқарылып келеді. “Өнеркәсіпті дамыту қоры” отандық контейнерлерді өндірушілер мен сатып алушылар үшін жеңілдікпен кредит беру тетігін іске қосады.

Автотасымалдау саласында отандық тасымалдаушылардың бәсекеге қабілеттілігін арттыру үшін біз автопарк санын арттыру бойынша жұмыстар жүргізіп жатырмыз. 2023 жылдан бастап 2028 жылға дейін Еуро-5 экологиялық класты ершікті тартқыштар бастапқы тіркеуден босатылады деп жоспарлануда. Сондай-ақ салмағы 12-ден 50 тоннаға дейінгі көліктің бұл түрі утилизациялық алымынан босатылады.

• 29.03.2022
• 206