Бүгін министрлікте азаматтарды жеке мәселелерімен қабылдап, өзекті сұрақтарына жауап бердім

⚜️Бүгін министрлікте азаматтарды жеке мәселелерімен қабылдап, өзекті сұрақтарына жауап бердім. Қабылдауға жазылғандар Нұр-Сұлтан, Алматы, Ақтөбе, Ақтау, Шымкент қалаларының тұрғындары. Азаматтардың басым көпшілігі мүмкіндіктеріне қарай тікелей келіп қатысса, кейбір тұрғындар өз сауалдарын ZOOM арқылы жолдады. Қойылған сұрақтардың көбі тұрғын үй-коммуналдық шаруашылық, жолаушылар тасымалын ұйымдастыру мен жүзеге асыру, сондай-ақ жол мәселесі бойынша болды.

Қабылдауға келген елорда тұрғыны Нұр-Сұлтан қаласындағы тұрғын үй кешендерінің біріндегі құрылыс сапасына шағымданды. Аталған сұрақ бойынша тиісті тапсырма беріп, мәселе тікелей бақылауымда болатынын айттым.

Тағы бір азаматтың сұрағына сәйкес, биыл мамыр айынан бастап іске қосылатын жеке тұрғын үй қорынан жалға алуды субсидиялау қағидалары туралы да түсініктеме беріп өттім.

Сонымен қатар баспана мәселесін алға тартып, Шымкент қаласының тұрғыны да қабылдауымда болды. Мүмкіндіктері шектеулі екі бала тәрбиелеп отырған ана тұрғын үй бойынша көмек сұрады. ІІ топтағы мүгедек санатындағы азаматша 2014 жылдан бастап тұрғын үй алу кезегінде тұрғанын айтты. Осы және қосымша зерделеуді қажет ететін басқа да мәселелерді өз бақылауыма алып, министрліктің құрылымдық бөлімше басшыларына тиісті тапсырмалар бердім.

• 31.03.2022
• 173