Бүгін Орталық коммуникациялар қызметі алаңында өткен брифингке қатысып, индустриялық жобаларды жүзеге асыру барысы туралы айттым

🔷 Бүгін Орталық коммуникациялар қызметі алаңында өткен брифингке қатысып, индустриялық жобаларды жүзеге асыру барысы туралы айттым. Журналистердің өзекті сұрақтарына жауап беріп, кейбір мәселелерді өзімнің жеке бақылауыма алдым.

Мемлекет басшысының тапсырмасына сәйкес біз өңдеу өнеркәсібінің қазіргі жай-күйі мен даму перспективаларына терең талдау жүргіздік. Атап айтқанда, импортты алмастыру, ішкі нарықты дайын өнімдермен қамту, экспорттық әлеуетті арттыру бойынша мүмкіндіктер зерделенді. Бұл ретте шикізат базасы, инфрақұрылым және кадрлық құзырет сияқты маңызды факторлар ескерілді.

Импорттың жалпы сомасы жылына $38,4 млрд құрайды. Негізінде елімізге машина жасау, химия өнеркәсібі, қара және түсті металлургия, жеңіл өнеркәсіп, сондай-ақ құрылыс материалдары өнімдері өте көп жеткізіледі.

Негізгі жобаларды жүзеге асыру арқылы керамикалық плиталар, автоклавты газоблок, жылу оқшаулағыш материалдар, санфаянс, сэндвич панельдер және басқа да өнімдердің импортын толық алмастыруға болады. Бұдан басқа, атқарылып жатқан жұмыстар болат импортын 75%-ға азайтуға, сондай-ақ отандық мақтаны толықтай өз елімізде қайта өңдеуге мүмкіндік береді деп күтілуде.

Бүгінгі таңда өңдеу өнеркәсібінің 6 бағытында инвестициялық жобалар пулы жасалды. Оған жалпы сомасы 20 трлн теңге болатын 700-ден астам іске асырылып жатқан және перспективалық өндірістер кірді. Нәтижесінде 131 мың жаңа тұрақты жұмыс орнын ашу көзделіп отыр.

Негізі жобалар 4 санатқа бөлінген:
🔹биыл енгізілетін
🔹іске асырылатын
🔹пысықталатын
🔹перспективалық жобалар

Импортты алмастыру шеңберінде зауыттар салу жоспарланып отыр. Бұл туралы толығырақ келесі жазбаларымда айтып беремін.

• 05.04.2022
• 178