Қазақстан мен АҚШ Адам құқықтары мен демократиялық реформалар бойынша жоғары деңгейдегі диалогтың алғашқы отырысын өткізді

Нұр-Сұлтан, 2022 жылғы 11 сәуір – ҚР Президенті Әкімшілігі Басшысының орынбасары – ҚР Президентінің Халықаралық ынтымақтастық жөніндегі арнайы өкілі Ержан Қазыхан мен АҚШ Мемлекеттік хатшысының азаматтық қауіпсіздік, демократия және адам құқықтары мәселелері жөніндегі орынбасары Узра Зеяның тең төрағалығымен Қазақстан мен АҚШ арасындағы адам құқықтары мен демократиялық реформалар жөніндегі жоғары деңгейдегі диалогтың бірінші отырысы өтті.

Іс-шараның күн тәртібінде екіжақты қарым-қатынастың өзекті мәселелері, оның ішінде азаматтық қоғамның дамуы, діни сенім бостандығы, Қазақстандағы саяси реформалар, әйелдердің құқықтары, бостандықтары мен мүмкіндіктерін кеңейту қамтылды. Тараптар, сондай-ақ, өңірлік және көпжақты форматтардағы ықпалдастық мәселелерін талқылады.

Мемхатшының орынбасары Президент Қасым-Жомарт Тоқаевтың Қазақстанның қоғамдық-саяси жүйесін одан әрі демократияландыруға және «Жаңа Қазақстан» құруға бағытталған саяси реформаларын қолдайтынын және АҚШ-тың еліміздегі жаңғырту әрекеттеріне мейлінше қолғабыс жасауға дайындығын растады.

АҚШ делегациясының Нұр-Сұлтанға сапары шеңберінде америкалық қонақты Қазақстан Республикасы Премьер-Министрінің орынбасары – Сыртқы істер министрі Мұхтар Тілеуберді қабылдап, екі мемлекет арасындағы кеңейтілген стратегиялық серіктестіктің негізгі мәселелерін талқылады.

Сонымен қатар, делегацияның ҚР бірқатар басқа да ресми тұлғаларымен және азаматтық қоғам өкілдерімен кездесулері жоспарланған.

• 12.04.2022
• 227