Бүгін азаматтардың жеке мәселелері бойынша кезекті бірыңғай қабылдау өткіздім.

Қабылдауға 100-ге жуық азамат жазылып, өтініштерін білдірді. Тұрғындар негізінен тұрғын үй, әлеуметтік сала және инфрақұрылым мәселелері жөніндегі талап-тілектерін жеткізді.

«Түркістан» сарайында өткен қабылдауда орынбасарларым мен басқарма басшылары да тұрғындардың жеке мәселесін тыңдады.

Өтініш пен арыз-шағымдар әр түрлі. Әрбірін жеке тыңдап, шешім жолдарын талқыладық. Жеке бастың мәселесі жария болмағаны дұрыс. Заң аясында шешімі табылып жатса еңбектің босқа кетпегені деп білемін.

Жалпы қазір қалада тұрғын үй тізімінде 48 623 азамат тіркелген. Соның ішінде 1 819 ата-анасының қамқорлығынсыз қалған бала, 9 186 көпбалалы отбасы, 16 957 халықтың әлеуметтік жағынан әлсіз тобы, 20 634 бюджеттік қызметшілер және үйі апатты жағдайда деп танылған 27 азамат бар. Кезекті азайту мақсатында соңғы екі жылда тұрғын үй құрылысына басымдық беріп, 1млн. шаршы метрдің үстінде үй салып отыруды қолға алдық.

Қабылдауға жазылған бірқатар тұрғын жер телімдері бойынша мәселерін көтерді. Жер учаскелерін заңдастыру бойынша туындаған барлық мәселелер заң талаптары аясында шешілетінін түсіндіріп өттім. Тұрғындарға мәселені жан-жақты дұрыс түсіндіру өте маңызды. Сонда ғана ортақ келісімге келеміз.
Бұл бағыттағы жұмыстарымыз жүйелі түрде жалғасады.
 

• 21.04.2022
• 188