Түркістан қаласында Орта Азияның Мемлекетаралық Үйлестіру су шаруашылығы комиссиясының отырысы өтуде.

Түркістан қаласында Орта Азияның Мемлекетаралық Үйлестіру су шаруашылығы комиссиясының отырысы өтуде. Басты мақсаты – трансшекаралық өзендердің суын пайдалануды үйлестіру.
Түркі әлемінің рухани астанасында ұйымдастырылған халықаралық жиында дамудың жаңа сатысына көтерілген Түркістан қаласын суландыру бағытында іске асырылған және алда атқарылатын жобалармен бөлістім.  Ағын суды тиімді пайдалану мақсатында өңірде ылғал үнемдеу технологияларын ендіру жолға қойылған. Соңғы 2 жылда 172 шақырым 23 каналға жөндеу және 241 шақырым 121 қашыртқыға механикалық тазалау жұмыстары жүргізілді. Нәтижесінде 92 мың га суармалы жердің мелиоративтік жағдайы жақсарды. Түркістан қаласына 248,8 млн. текше метр ағын су жеткізудің жолын таптық. Түркістанның айналасында 11 мың гектарға азық-түлік белдеуін қалыптастырылуда. Жоба толығымен жаңбырлатып суғару технологиясымен жүзеге асырылып жатыр. Жалпы азық-түлік белдеуі аясында құны 30,7 млрд. теңгені құрайтын 6 серпінді инвестициялық жоба жүзеге асырылуда. Су және азық-түлік қауіпсіздігі, трансшекаралық су ресурстарын тиімді пайдалану секілді аса маңызды мәселелерді бірлесіп шешу қажет. Бұл шекаралас жатқан елдер үшін ортақ іс болғандықтан, бүгінгі кеңес нәтижесінде өзекті мәселелер оңды шешімін табады деп сенемін.

• 28.04.2022
• 247