Берекелі Бәйдібек ауданына барып, елмен жүздесіп, пікір алмастым

Берекелі Бәйдібек ауданына барып,  елмен жүздесіп, пікір алмастым. Алдымен өзін-өзі жұмыспен қамтыған, мемлекеттік гранттар арқылы кәсібін дөңгелеткен бәйдібектік ағайынның қолынан шыққан өнімдердің көрмесін тамашаладым. Сонымен бірге ауыл шаруашылығы техникаларын да көрдік. Елде кәсіпкерлікке деген оң ниет бар. 
Мемлекет басшысы Қасым-Жомарт Тоқаевтың тапсырмасымен елімізде дағдарысқа қарсы шешімдер қабыданып жатыр. Басты мақсат – азаматтардың табысын төмендетіп алмау, жұмыс орындарын қысқартпау. Бұл ретте Түркістан облысында да «Еңбек» бағдарламасы, «Қарапайым заттар экономикасы» бағдарламасы аясында кәсіпкерлікпен айналысам деушілерге гранттар бер беріліп, қолдаулар көрсетілуде. Шағын кәсіпкерлік пен ауыл шаруашылығының маңызы зор. Бір адам кәсіпкерлікті меңгеріп, үш тұрғынды жұмыспен қамтыса, жұмыссыздық мәселесі де шешімін табар еді. Біз осы салаға басымдық беруіміз керек.
Бәйдібек ауданы тұрғындарымен кездесуде осы және өзге де атқарылып жатқан жұмыстарға тоқталып, мәселелердің шешу жолдарын тақыладық. Ауданда оң өзгерістер бар. Түрлі нысандар салынып, жобалар жүзеге асып жатыр. Өзім осында туып-өскендіктен бұл жердің проблемаларын да жақсы білемін. Ең үлкен мәселе су еді, қазір скважиналар қазылуда. Су қоры анықталды. Бұл істі соңына дейін жеткіземіз. Бұрын Бәйдібекте газ жоқ еді, қазір қамту көрсеткіші еселеп артып жатыр. Ынтымақ елді мекенін газға қосу іс-шарасында болып, тұрғындардың қуанышымен бөлістім. Осы сәуір айында 8 ауылға газ берілді. Мыңбұлақ ауылдық округі «көгілдір отынмен» 100 пайыз қамтылды. 
Тұрғындардың өмір сүруіне қолайлы жағдай жасау бағытындағы жұмыстар жалғасады. Тау мен тасы тарихтан сыр шертетін өлкенің келешегі жарқын болатынына сенемін!

• 29.04.2022
• 259