Бизнесті қорғау – қадағалау қызметіндегі басымдық

Кәсіпкерлердің шағымдарына жедел ден қою мақсатында әрбір прокуратурада тәулік бойы режимде прокуратура органдарының бизнесті қорғау жөніндегі мобильді топтары жұмыс істейді (дереу шығу, Сall-орталық тәулік бойы 24/7).

2022 жылдың үш айында оларға 803 кәсіпкер жүгінді, әрбір төртінші бұзушылық фактісі расталды.

Шағымдардың сипаты бойынша бұл ерекше жағдайлар ғана емес, сонымен қатар құқықтық актілерге өзгерістер енгізуді талап ететін жүйелі проблемалар болып отыр.

Прокурорлар бизнестің дамуына кедергі келтіретін әкімшілік кедергілерді түпкілікті жоюға дейін жан-жақты шаралар қабылдады.

Мысалы, 2022 жылғы 25 наурызда Павлодар қаласы прокуратурасының қадағалау актісі бойынша өңірдегі барлық кәсіпкерлер үшін әлеуметтік маңызы бар азық-түлік тауарларының (ӘМАТ) бағасын тұрақтандыру үшін қарыз беру өлшемдері өзгертілген болатын.

Бұған дейін, қарыз алу конкурсына Павлодар облысы әкімдігінің 2019 жылғы 27 қарашадағы №338/3 қаулысында көрсетілген барлық талаптарға сәйкес келетін кәсіпкерлер ғана қатыса алатын (жалға алу/меншік құқығында сауда-логистикалық инфрақұрылымның болуы; бөлшек сауданы жүзеге асыру; облыс аумағында ӘМАТ өндіруді немесе өсіруді жүзеге асыру).

Алайда олар шағын бизнес субъектілерін ірі кәсіпкерлерге қатысты тең емес жағдайға қойып, мемлекеттен қарыз алу мүмкіндігін жоққа шығарды. Бұл ӘМАТ бағасының өсуіне және прокуратура органдарына негізделген шағым жасауға алып келді.

Павлодар қаласы прокурорының ұсынысы бойынша әкімдік қаулысына өзгерістер енгізілді және енді кәсіпкерлерге қарыз алу үшін өлшемдердің біреуіне ғана сәйкес келсе жеткілікті.

Нәтижесінде кәсіпкерлердің шектелмеген тобының ғана емес, өңір тұрғындарының да құқықтары қорғалды.

Жалпы, кәсіпкерлік саласында, оның ішінде Мобильдік топтардың жұмысы аясында анықталған бұзушылықтар бойынша прокурорлар 2022 жылдың 1 тоқсанында 64 мыңнан астам бизнес субъектісінің құқықтарын қорғады.

Прокурорлық қадағалаудың 432 актісі енгізілді, 8,8 млн теңгеден астам сомаға 311 әкімшілік іс жүргізу, 291 заңсыз тексеру, 113 заңсыз тыйым салу-шектеу шаралары, мемлекеттік органдардың 29 актісінің күші жойылды, тәртіптік жауапкершілікке 195 лауазымды тұлға, әкімшілік жауапкершілікке 13 тұлға тартылды.

• 29.04.2022
• 308