Елордада қаза болған әскери прокурорды еске алуға арналған стелла ашылды

Бүгін Нұр-Сұлтанда өткен жылдың тамыз айында қызметтік борышын орындау кезінде қайғылы қаза тапқан Оңтүстік өңірдің әскери прокуроры әділет полковнигі Арман Қапезовке арналған естелік стелланың ашылуы өтті.

Іс-шараға оның сол өңірдегі әріптестері, туыстары мен жақындары қатысты.

Қатысушылар Арман Капезовтің жеке және кәсіби қасиеттерін, оның адалдығын, әділдігін, әдептілігін оптимизмі мен өміршеңдігін атап өтті.

Қайғылы оқиға болған күні әскери бөлімдегі өрт туралы хабар алған А.Қапезов әріптестерімен дереу оқиға орнына шыққан.

Ол бірден батыл әрекет танытып, қауіптілік дәрежесі туралы ақпаратты жинау және бағалау жұмыстарын ұйымдастырды.

А.Қапезов өрттің эпицентріне жақын жерде болды және жарылыс салдарынан оқиға орнында қайтыс болды.

Әріптесіміз прокуратураға 24 жыл өмірін арнаған екен.

Қатардағы қызметкерден басшы лауазымына, лейтенанттан полковник аранйы атағына  дейінгі дәрежеге жеткен.

Әріптестерінің ортасында сыйлы,  беделді бола білді.

Туыстары мен достарының қайғысына ортақтаса  отырып, әріптестері өз тарапынан алдағы уақытта оның отбасына қолдау мен көмек көрсетуге дайын екендіктерін атап өтті. 

Оның батылдығы мен  ержүректілігі әрбір прокурор үшін, әсіресе жас қызметкерлерге  үлгі болары сөзсіз.

Естеріңізге сала кетейік, 2021 жылғы 26 тамызда Жамбыл облысы Байзақ ауданының № 28349 әскери бөлімінде оқ-дәрілердің жарылуынан оңтүстік өңірдің әскери прокуроры қайғылы қаза тапқан еді. Оның артында төрт баласы қалды.

Ерлігі мен қайсарлығы үшін Мемлекет басшысының Жарлығымен Арман Қапезов қайтыс болғаннан кейін I-дәрежелі «Айбын» орденімен марапатталды.

Тараз қаласында қаза тапқандарды еске алу үшін әскери прокуратура ғимаратының қасбетінде өткен жылдың қыркүйек айында мемориалдық тақта ашылды.

• 03.05.2022
• 310