Жыл басынан бері еліміздің өндірістік объектілерінде 10 мыңнан астам өнеркәсіптік қауіпсіздік талаптарын бұзу деректері анықталды

Жыл басынан бері Өнеркәсіптік қауіпсіздік комитетінің аумақтық департаменттерінің мемлекеттік инспекторлары 637 тексеру жүргізді. Оның ішінде ерекше тәртіп бойынша 340 тексеру және 297 жоспардан тыс тексеру жүргізілді. Республика бойынша барлығы 10 043 объекті тексерілді, өнеркәсіптік қауіпсіздік талаптарының 10 486 бұзушылығы анықталып, өндіріс объектілеріне 75,5 млн. астам теңге сомасында 441 әкімшілік айыппұл салынды.

Адамдардың өмірі мен денсаулығына қауіп тудыратын өнеркәсіптік қауіпсіздік талаптарын бұзуға жол бергені үшін 225 объектінің жұмысы  тоқтатылды. Оның ішінде өнеркәсіптік қауіпсіздік саласында жұмыс жүргізу құқығына ие 3 аттестаттың құзыреті тоқтатылды.

Өндіріс объектілеріне жұмыс жүргізу кезінде қауіпсіздік талаптарын бұзғаны үшін 365 айыппұл және жарылғыш материалдарын қолдану кезінде қауіпсіздік талаптарын бұзғаны үшін 20 айыппұл салынды.

Салалар бөлінісінде айыппұлдардың негізгі саны көтергіш құрылыстарды пайдаланатын объектілерге (17%), сондай-ақ тау-кен (12%) және мұнай-химия (мұнай өңдеу) салаларына (9%) тиесілі.

4 айдың қорытындысы бойынша Нұр-Сұлтан, Алматы қалаларында, Атырау облысында қауіпті өндірістік объектілерде 6 авария тіркеліп, салдарынан 3 адам қаза болды және бір адам ауыр жарақат алды.

Бұдан басқа, аварияға алып келмеген, қауiптi өндiрiстiк объектiде қолданылатын техникалық құрылғылардың істен шығуы немесе бүлінуі, технологиялық процесті жүргізудің қауіпсіздігін қамтамасыз ететін параметрлерден ауытқу бойынша 67 оқыс оқиға тіркелді.

Авариялар мен оқыс оқиғалардың негізгі себептері:

1) өнеркәсіптік қауіпсіздік талаптарын бұзу;

2) пайдаланылатын жабдықтың жоғары моральдық және физикалық тозуы;

3) қызметкерлердің өндірістік және еңбек тәртібінің төмендігі.

Өнеркәсіптік қауіпсіздік комитеті кәсіпкерлерді қауіпті өндірістік объектілердің жай-күйіне тұрақты бақылауды жүзеге асыруға, ақаулар мен ақаулы бөліктер (бөлшектер) анықталған кезде, уақтылы ауыстыруды жүзеге асыруға, жұмыскерлермен өнеркәсіптік қауіпсіздікті сақтау бойынша тұрақты негізде нұсқама жүргізуге кеңес береді. Азаматтар, кәсіпорынның өзі және қоршаған орта үшін апаттың ауыр салдарын әрдайым есте сақтаңыздар.

• 04.05.2022
• 295