Шорнақ ауылына барып тұрғындармен кездестім

Бүгін Кентау қаласына қарасты Шорнақ ауылына барып тұрғындармен кездестім. Өздеріңіз білесіздер, кеше тұрмыстық жанжал орын алды. Ауылдағы қазіргі жағдай тұрақты. Жағдай тынышталды, екі тарап қол алысып, табысты. Кешелі бері осында тексеріс жүргізіп 80-ге жуық тәртіп бұзған адам тіркелді. Сырттан келіп, жастарды үгіттеп, осы іске итермелегендер де бар. Жергілікті полиция, ҰҚК тергеу жұмыстарын жүргізіп, жауап алып жатыр. Бүгін Мемлекет басшысы Қасым-Жомарт Тоқаев Шорнақтағы жағдай бойынша жиын өткізіп, кінәлілерді қатаң жазалауға тапсырма берді. Тағы да айтамын, бұл жерде ұлтаралық мәселе жоқ, бұл – бұзақылық жағдай.  ⠀
   ⠀
Шорнақ – мыңжылдық тарихы бар мекен. Қазақ-өзбек ағайындар ежелден бірге келе жатқан, тіліміз бір, дініміз бір, малы қоралас, елі аралас боп жатқан бауырлас елміз. Біз екі ұлт арасында ешқашан алауыздыққа, төбелесуге жол бермейміз. Кеше орын алған жағдай бүкіл елге тарап, ыңғайсыз жағдай орын алды. Ынтымағы мен бірлігі жарасқан ауыл үшін бұл ұят нарсе. Әрине, әлеуметтік желінің дамыған сәтінде бұл жағдайды бұрмалайтын арандатушылардың болары анық. Тек солардың сөзіне еріп кетпеу керек. Ауыл ақсақалдары да жастар мен аға буынды сабырға шақырып бірлікті нығайтуға күш жұмсау керек. ⠀
⠀
Естеріңізге салайын, ел арасына дау, іріткі салған адамдарға қатаң жаза қолданылады. Бұл мәселені Президент Қасым-Жомарт Тоқаев тікелей бақылауында ұстап отыр.⠀

• 29.10.2020
• 520