САРЫАҒАШ ПЕН КЕЛЕС САПАРЫ

Cаялы Сарыағаш пен берекелі Келес аудандарына арнайы іссапармен барып, тұрғындармен кездестім. Аудан тұрғындарының басым көпшілігі мемлекеттік бағдарламаларды тиімді пайдаланып, жеке кәсібін домалатуда,  ауыл шарушалығы саласында еңбек етіп, отбасыларын асырап жүр. Ауыл шаруашылығы дамыған өңірде су мәселесі, жайылымдық жер мәселесі жиі айтылды. Ағын су бойынша біз барынша су үнемдеу технологиясына көшуіміз керек. Ондай жобаларға қолдау көрсетіледі. Жайылым тапшылығы да күрделі. Мемлекет тарапынан пайдаланылмай жатқан алқаптарды ортақ жайылымға беру бойынша жұмыс жүріп жатыр. Мал бордақылау алаңдарын ашуға күш салған жөн. 
Кездесуде тұрғындар аудандарда жаңа мектеп салу, заман талабына сай оқушылар сарайы мен мәдениет үйін салу, жол, аяқжол, көгілдір отын, емхана, интернет, ағын су мәселесін көтерді. Мал ұрлығы мен жұмыссыздық жайлы да сөз қозғалды. 
Сарыағаш ауданында перинеталдық орталықтың құрылысы басталады, 500 орындық емхана салынады. Жаңадан ашылған «HighSchool» of Saryagash» жеке меншік зияткерлік мектебінде болып, жұмысымен таныстым. Онда 430 оқушы білім алуда. Жеке меншік мектептерді де көбейту игі іс болмақ. 
Келеске келсек, біз жаңа аудан құрылған сәттен бюджетін молайтып, барынша қолдау көрсетіп келеміз. Аудан орталығы көркейіп, жаңа ғимараттармен толықты. Ауданда құрылыс қарқыны күрт өсті. Жылына 2-3 мектеп салынады. Газ бойынша 9 елді мекеннің құрылыс жұмыстары аяқталды. Бұл – жақсы көрсеткіш. 
Кездесуден соң аудандардың тұрғындарын жеке мәселелері бойынша қабылдадым. Көтерілген әрбір мәселе назарға алынып, өзекті мәселелерді шешу бойынша жүйелі жұмыс жалғасады. -- https://youtu.be/-H7xKN10sz4

• 11.05.2022
• 273