ТҮРКІСТАНДА ШАҒЫН КӘСІПКЕРЛІК ДАМЫП КЕЛЕДІ

Түркістан облысы шағын кәсіпкерлікті дамыту бойынша елімізде алдыңғы қатарда. Қазіргі таңда олардың саны 147 мыңнан асады. Бұл – шағын және орта бизнесті дамытуға көрсетілген қолдаудың жемісі.

Аппарат отырысында кәсіпкерлерге жасалып жатқан мемлекеттік қолдау туралы кеңінен талқыладық. Облысымыз «Қарапайым заттар экономикасы» бағдарламасын жүзеге асыру бойынша да көшбасшылар қатарында тұр. Аталған бағдарлама арқылы 42,9 млрд. теңгеге 315 жоба қаржыландырылған. «Бизнестің жол картасы 2025» бағдарламасының бюджеті биыл 11,6 млрд. теңгеге жетіп, қазіргі таңда несиелендіру жұмыстары басталды. Биыл несиелерді субсидиялау арқылы кәсіпкерлерге жеңілдетілген 6%-бен 40 млрд. теңге несие беру қолға алынды. «Бастау Бизнес» түлектеріне қазірдің өзінде 1,4 млрд. теңгеге несие берілді, қосымша 1,1 млрд. теңгеге несиелендіру жалғасып жатыр.

«Керуен Сарай» және «Эко Базар» кәсіпкерлеріне арналған «Yassy Business» бағдарламасы жұмыс істеуде.  Қазіргі таңда 180 млн. теңгеге 10 жоба қаралуда. Бағдарлама шеңберінде кәсіпкерлерге 25 млн. теңгеге дейін 7 жылға 4%-бен несиелер беріледі.

Аудан тұрғындарымен кездесулерде шағын бизнестің артықшылығы туралы үнемі айтып келемін. Өңір ғана емес, елдің экономикасын көтеріп, жұмыссыздықты жоюда осы саланың маңызы зор. Жауапты басқарма мен аудан, қала әкімдеріне кәсіпкерлікпен шұғылданғысы келетін азаматтарға қолдауды күшейтуді тапсырдым. Менің ойымша, қоғам осы салаға мән беріп, жетістікке жетеді. Ол – уақыт талабы.

• 12.05.2022
• 139