Еліміздің ресми делегациясы құрамында мемлекет басшылары Қасым-Жомарт Тоқаев пен Режеп Тайип Ердоғанның кездесуіне қатыстым.

Еліміздің ресми делегациясы құрамында мемлекет басшылары Қасым-Жомарт Тоқаев пен Режеп Тайип Ердоғанның кездесуіне қатыстым. Сондай-ақ сапар барысында қорғаныс саласына және қорғаныс өнеркәсібі мәселелеріне жауапты түрік әріптестермен кездестім.
Транспорт, өнеркәсіп, құрылыс және әскери техника салаларында жүзеге асырылып жатқан, сонымен бірге алдағы уақытта іске қосылатын бірлескен жобаларды талқыладық.

Түркияға жасалған мемлекеттік сапардың қорытындысы бойынша Индустрия және инфрақұрылымдық даму министрлігі тарапынан халықаралық құрамдастырылған жүк тасымалдары туралы Үкіметаралық келісімге қол қойылды. Сондай-ақ, Баку-Тбилиси-Карс теміржол желісінің тұрақты түрде пайдалануға берілуі де бұл жобаның дамуына қосымша серпін береді деп жоспарлап отырмыз. Аталған желі Түркияға бағытталған оңтайлы маршрут құруға және еуропалық теміржол желісіне шығуға жол ашпақ.

Кездесу барысында екі ел арасында ұшу географиясын кеңейту және рейстердің санын одан әрі арттыру мәселелері жайында келіссөздер өткізу бойынша да ұсыныс жасалды. Кездесу шілде айына жоспарланып отыр. Жалпы, Түркиямен арадағы әскери-техникалық ынтымақтастығымызды да одан әрі артыру көзделіп отыр.

Кездесу қорытындысы бойынша Мемлекет басшысы қол жеткізілген келісімдерді жүзеге асыру мәселесіне назар аударып, өзінің жеке бақылауына алды. Біз өз тарапымыздан аталған бағыттағы жұмысты жалғастыратын боламыз. 

• 13.05.2022
• 214