Бақыт Сұлтанов азаматтарды жеке қабылдады

Қазақстан Республикасы Премьер-Министрінің орынбасары – сауда және интеграция министрі Бақыт Сұлтанов азаматтарды жеке қабылдады.

Екі сағатта Б.Сұлтанов бес азаматтың өтінішін қарады. Олардың қатарында түрлі мәселемен келген Нұрсұлтан, Алматы және Тараз қаласының тұрғындары да бар.

Азаматтардың сауалдары тұтынушылардың құқығын қорғау саласына, техникалық реттеу жүйесінің жағдайына және шағын бизнесті ашуға қолдау көрсетуге қатысты болды.

Атап айтқанда, кездесуде сапасыз болып шыққан тұрмыстық тауарды қайтару бойынша дүкен міндеттемесін орындамағаны туралы мәселе көтерілді. Бақыт Сұлтанов қосымша тәуелсіз сараптама жүргізуді ұсынды. Тауардың ақаулығы расталған жағдайда тұтынушылардың құқығын қорғау комитетіне қаражатты қайтаруға көмек көрсету тапсырылды.

Қабылдауға келген астана тұрғыны Қазақстандық белгілі маркалы автокөліктердің ресми дистрибьюторынан алған көліктің кепілдік мерзімі аясында қолдау көрсетуін сұрады. Өтініш берушінің айтуынша, жаңа машинаны сатып алғаннан кейін қозғалтқышында проблема анықталған. Алайда, кепілдік міндеттемелер басқа дистрибьюторға берілгендіктен, кепілдіктің орындалуын қамтамасыз ету мүмкін болмады. Бақыт Сұлтанов тұтынушылардың құқықтарын қорғау комитетіне заң мәселелері бойынша көмек көрсетуді және қажет болған жағдайда тұтынушының мүддесін қорғауды қамтамасыз ете отырып, сотқа үшінші тұлға ретінде қатысуды тапсырды.

Сондай-ақ, қабылдау барысында ҚР техникалық реттеу жүйесі мәселесі бойынша өтініш білдірді. Сұлтанов Техникалық реттеу және метрология комитетіне ведомствоаралық және сараптамалық деңгейде әдістемелік орган құру, оның ішінде техникалық реттеу жүйесін дамытуға бағытталған кәсіби қызмет сарапшыларының ортасын құру бойынша ұсыныс беруді тапсырды.

Одан бөлек, жұмысқа орналасуға көмектесу және дүкен ашуға орын және қаражат бөлу туралы өтініштер де болды. Бақыт Сұлтанов Қазақстанда «Еңбек» жұмыспен қамтуды дамыту бағдарламасы сәтті жүзеге асырылып жатқанын, оның аясында азаматтардың жұмысқа орналасуына, қажет болған жағдайда олардың біліктілігін арттыруға немесе жаңа мамандықтарды оқытуға жәрдемдесетінін айтты.  Бағдарлама аясында жеке бизнес  ашуға және бизнес-идеяларды жүзеге асыруға грант алуға болады.

Премьер-Министрдің орынбасары кез келген азамат "Бастау-Бизнес" бағдарламасы шеңберінде бизнес-идеяны іске асыру үшін қолдау ала алатынын айтты.

Бақыт Сұлтанов барлық өтініштерге толық жауап берді. Барлық көтерілген мәселелер Премьер-Министр орынбасарының жеке бақылауына алынды. Жауапты тұлғаларға тиісті тапсырмалар берілді.

• 16.05.2022
• 341