БИЫЛ ТҮРКІСТАН ОБЛЫСЫНДАҒЫ МЕКТЕПТЕРДЕН 27 МЫҢ ОҚУШЫ ТҮЛЕП ҰШАДЫ

Мемлекетті дамытуда, «Жаңа Қазақстан» тұжырымдамасын жүзеге асыруда адами капиталдың маңызы зор. Ал ол білім беру саласына тікелей байланысты. Аппарат жиынында оқу жылының аяқталу барысы мен ҰБТ-ға дайындық жұмыстарын, білім саласындағы мәселелерді талқыладық.

Білім сапасын арттыру және пандемия, шектеу шаралары кезеңінде жіберілген кемшіліктердің орнын толтыру мақсатында 26 мамыр мен 17 маусым аралығында жазғы мектепте оқыту ұйымдастырылуда. Оқушыларды еңбекке баулу мақсатында жаз мезгілінде 100 мыңнан астам бала көркейту, көгалдандыру жұмыстарына қатысады. Сонымен қатар жазғы сауықтыру лагерлерінде 22 мыңнан астам бала тегін демалады. Мектеп жанындағы ойын-сауықтыру ошақтарында 120 мыңға жуық бала тегін қамтылмақ. Олимпиада, спорттық жарыстар мен өнер сайыстарының жеңімпаздарын дайындаған ұстаздарға шипажайларға баруға қолдау көрсетіледі. Ал еңбек өтілі жоғары ұстаздарға шипажайларда жеңілдіктер қарастырылған.

Биыл Түркістан облысында 27 мыңнан астам оқушы мектеп бітірсе, оның 22 мыңнан астамы ұлттық бірыңғай тестілеуді тапсыруға ниетті. Жыл сайын мектепті үздік жетістікпен бітірушілер саны артуда. Биыл облыста 1250 оқушы «Алтын белгіге» және 2 мыңға жуық түлек үздік аттестат алуға үміткер. ҰБТ компьютерлік форматта өткізіледі. Биыл 73 мың грантқа дейін бөлу жоспарлануда, оның ішінде техникалық мамандықтарға грант үлесі 60%-ға дейін өсті. Техникалық және кәсіптік білім беретін оқу орындарына жергілікті бюджеттен 7000 грант бөліну қарастырылған. Қосымша республикалық бюджеттен 9-сынып бітірушілері үшін 10 000 грант бөліну жоспарланып отыр. Бұл қолдауды Түркістан облысының өрендері де тиімді пайдаланады деп сенемін. Түлектерге сәттілік тілеймін!

• 17.05.2022
• 226