Үкімет отырысына қатысып, автомобиль жолдары және көлік саласын дамыту бағытында атқарылып жатқан жұмыстар туралы баяндап бердім

⚜️Үкімет отырысына қатысып, автомобиль жолдары және көлік саласын дамыту бағытында атқарылып жатқан жұмыстар туралы баяндап бердім.

Бүгінгі таңда республикалық желінің 7,3 мың шақырымында жұмыстар жүргізілуде. Оның 4,3 мың шақырымында құрылыс және реконструкциялау жұмыстары жүріп жатыр. Жылдың соңына дейін 1,6 мың шақырым жолды пайдалануға беру жоспарланған.

Автожолдарды дамыту Мемлекет басшысы Қасым-Жомарт Тоқаевтың тапсырмасына сәйкес «Қуатты өңірлер — ел дамуының драйвері» ұлттық жобасы аясында жүзеге асырылуда. Жобаға сәйкес 2022 жылы республикалық маңызы бар жолдардың 91 пайызын, ал жергілікті жолдардың 85 пайызын нормативтік жағдайға келтіру жоспарланып отыр.

Сөз кезегінде Үкімет басшысы жергілікті әкімдер өңірдегі жолдардың жай-күйіне тікелей жауапты екендігін атап өтіп, бірқатар тапсырма жүктеді.

🔹Біріншіден, министрлігімізге жергілікті әкімдіктер және ҚазАвтоЖолмен бірлесіп, жоспарланған жобаларды уақытында пайдалануға беру мәселесін назарға алуды тапсырды. Сонымен бірге, ҚазАвтоЖол компаниясы жолдарды күтіп ұстау сапасы мен қауіпсіздігі бойынша жұмысты күшейтуі қажет екендігін тілге тиек етті. Бұл ретте автожолдарды қайта жаңғырту және жаңа жолдар салу бойынша ірі жобалар жүзеге асырылатынын айтқым келеді.

🔹Екіншіден, жыл соңына дейін автожолдардың жоспарланған учаскелерінде ақы төлеуді енгізе отырып, өзін-өзі қамтамасыз етуге көшіру жұмыстарын аяқтау қажет. Бұл өз кезегінде жолдарды нормативтік жағдайда күтіп-ұстауға мүмкіндік береді.

🔹Үшіншіден, жол бойындағы қызмет көрсету нысандарын жаңғырту жұмыстарын сапалы жүргізіп, 2026 жылға қарай ұлттық стандартқа сәйкестендіру қажет. Айта кетерлігі, алдағы уақытта мыңнан астам қызмет көрсету нысанын тиісті стандарттарға сәйкестендіру жұмыстары жалғасатын болады.

🔹Төртіншіден, құрылыс жұмыстарын үзіліссіз жүргізу үшін Энергетика министрлігі мен Қазақстан теміржолына құрылыс компанияларына қажетті мөлшерде битум мен қажетті инертті материалдарды жеткізу үшін теміржол вагондарымен қамтамасыз етуді тапсырды. Шын мәнінде, битумға деген қажеттілік биыл 1,1 млн тоннаны құрап отыр.

Жоғарыда аталған бағыттар бойынша жұмыстар алдағы уақытта жалғасатын болады.

• 17.05.2022
• 218