Қазақстан Республикасы Денсаулық сақтау және әлеуметтік даму министрі Т.Қ. Дүйсенованың Бүкіләлемдік қан доноры күнімен құттықтау сөзі

Құрметті қазақстандықтар!

2005 жылдан бері 14 маусымда Бүкіләлемдік қан доноры күні атап өтіледі. Бұл күн 1832 жылы босанған әйелдің өмірін сақтап қалған алғашқы сәтті қан құю оқиғасына орай арнайы бекітілген.

Бұл айтулы күн Қазақстанда да дәстүрлі түрде атап өтіледі. Жыл сайын елімізде "Қан өткізіп, донор бол, "Сенің күнің, Донор, "Мейірімділік эстафетасы сияқты тақырыптармен түрлі акциялар өткізіледі.

Бүкіләлемдік қан доноры күні қарсаңында барлық донорларды мерекелерімен шын жүректен құттықтаймын!

Донорлық – кәсіп те, жұмыс та, қолөнер де емес, дегенмен біз олармен мақтанамыз, өйткені олар мүлдем бейтаныс адамдар үшін қанын береді. Олардың сыйлау деген мағынаны білдіретін латынның "donare" сөзіне сай донор деп аталуы кездейсоқ емес.

Адамдар көбінесе өздерінің немесе жақындарының өміріне қауіп төнген кезде ғана қан өткізу жайлы ойланады. Ал қан әрқашанда керек. Қан орталықтарында донорларды қай кезде де қуана қарсы алады және шексіз риза болады.

Статистика бойынша, әрбір үшінші адам өмірінде қан құю қажеттігіне тап болады екен. Күн сайын мыңдаған адам донор қанына мұқтаж боп жатады. Әсіресе, гематологиялық, жансақтау, хирургия, транплантация, күйік бөлімшелерінде, онкологияда, перзентханаларда қан жиі керек болады. Көп жағдайда науқастардың өмірін сау қан құю арқылы ғана сақтап қалуға болады.

Адам өміріне араша түсетін адамгершіліктері мен мейірімділіктері, өмірге сенім сыйлайтындары үшін донорларға алғыс айтамын.

КСРО және Қазақ КСР-нің құрметті доноры - Александр Скаковскийді ерекше атап өткім келеді. Александр Николаевич еңбегі үшін "Шапағат медалімен және "Денсаулық сақтау ісінің үздігі төс белгісімен марапатталды. 2003 жылы ол Қазақстанның рекордтар кітабына еніп, қан донациясы саны бойынша әлемде екінші орынды иеленді.

Ерікті қан донорлығын қолдауға және қанға мұқтаж ауыр дертке шалдыққан адамдарға көмек көрсетуге бағытталған акцияларға белсенді қатысатын және еліміздің құрметті донорларының игі дәстүрін жалғастырып келе жатқан сүйікті әншілеріміз бен актерлерге, спортшыларға және басқа да танымал жандарға, қоғам қайраткерлеріне шын жүректен алғыс айтып, ризашылығымды білдіремін.

ҚР Денсаулық сақтау және

әлеуметтік даму министрі Тамара Дүйсенова

• 11.06.2015
• 15083