ТҮРКІСТАН МЕН АНКАРА БАЙЛАНЫСЫ ЖОҒАРЫ ДЕҢГЕЙДЕ

Түркістанға Анкараның губернаторы Васип Шахин жұмыс сапарымен келіп, екі өңір арасындағы байланысты талқыладық. Губернаторды түркі әлемінің астанасын өмір сүруге қолайлы, ғылымы мен мәдениеті дамыған ірі оазиске айналдыру бағытында жүріп жатқан жұмыстармен таныстырдым. 
Жуырда ҚР Президенті Қасым-Жомарт Тоқаев Түркияға мемлекеттік сапармен барды. Екіжақты маңызды келісімдерге қол қойылды. Түркістан облысының дамуына да түрік инвесторлары үлес қосып жатыр. Халықаралық әуежайдың құрылысын өте қысқа мерзімде талапқа сай етіп аяқтады. Қазіргі таңда заманауи госпитальдің құрылысын жүргізіп жатыр. Түркі кеңесі ұйымы аясында Түркістанда еркін экономикалық аймақ ашуға арнайы орын әзірлеуге де дайынбыз. Әсіресе, Анкара қаласынан жаңа технологияларды ендіру, ғылымды, туризмді дамыту бойынша әріптестік орнатуға мүдделіміз. 
Васип Шахин да өз кезегінде Анкарада жоғарғы технологияларды дамыту, ғарышты игеру, ғылым саласы бойынша ауқымды жобалар жүзеге асырылып жатқанын тілге тиек етіп, байланысты барынша нығайтып, Түркістанға қолдау көрсетуге, іскерлік қатынас орнатуға дайын екенін жеткізді. Шаһардағы тарихи және туристік орындарды аралаған түркиялық мейман өңірдегі өзгерістерді жоғары бағалады. Бірлігіміз нығая берсін!

• 18.05.2022
• 282