САЙРАМ ТҰРҒЫНДАРЫНЫҢ ӨТІНІШТЕРІ НАЗАРДА БОЛАДЫ

Сайрам ауданына арнайы іссапармен барып, тұрғындармен кездестім. Ауданда орналасқан шаруа қожалығында да болып, кәсіпкерлермен, шаруалармен тілдестім. 
Өздеріңізге белгілі, елімізде аса маңызды саяси реформалар жүріп жатыр. Ата Заңға өзгерістер енгізу бойынша референдум өтпек, сол саяси науқанда әрбір азамат белсенділік танытуы тиіс.
Мемлекет басшысы Қасым-Жомарт Кемелұлы наурыздағы Жолдауында 10 бағытта алдағы уақытта қандай реформалар болатынын айқындап берді. Суперпрезиденттік жүйе өзгертіліп, Парламент пен мәслихаттардың ықпалы күшейтіліп жатыр. Күні кеше Президентіміз еліміздің ірі бизнес өкілдерімен кездесіп, аса маңызды мәселелерге назар аударды. Кәсіпкерлерді қолдау, оларды қорғау шаралары күшейтілетін болды. Кәсіпкердің жұмысына кедергі жасағандардың ісі қатаң қадағаланады. Осы мәселе бойынша облыста құқық қорғау, салық және басқа да орган өкілдерімен кездесіп, тиісті жоспар жасаймыз. 
Өңірдің дамуына тоқталсақ, экономикалық жағдай тұрақты. Түркістан облысы құрылғалы бері барлық салада серпіліс бар. Инвестиция көлемі 2,5 есе өсті. Аймақта мұнай өңдеу зауыты, көмірден жанар-жағармай шығаратын зауыт, химия, фосфор өнеркәсібіне бағытталған өндіріс орындары ашылады. Ауыл шаруашылығында тамшылатып суғару, жаңбырлатып суғару, жылыжай ісіне басымдық беріліп жатыр. 
Кездесуде сайрамдықтар мектепті жөндеуден өткізу және мәдениет үйін салу бойынша ұсыныс тастап, коммуналдық мәселелерді көтерді. Мәдени және спорттық нысандар салуда инвесторлардың да әлеуетін пайдаланған жөн. Тойханалардың бағытын өзгертіп, арнайы кешенге айналдыруға болады. Аудандағы өзендердегі карьерлер мәселесін де қатаң бақылауға алдық. Заңсыз әрекеттерді тоқтату керек. Жалпы, осындай кездесулер біз үшін маңызды. Ауыл-аймақтың мәселелерін біліп, көп мағлұмат аламыз. Көтерілген әрбір мәселе назардан тыс қалмайды.

• 23.05.2022
• 292