ЕДБ-тің ақпараттық қауіпсіздігін қамтамасыз ету жөніндегі талаптарды күшейту туралы

Банк жүйесінің ақпараттық қауіпсіздігі ел экономикасының тұрақтылығын қамтамасыз ететін жүйе құраушы фактор болып табылады. Киберқауіптердің өршуіне байланысты банк клиенттері, олардың шоттарының жай-күйі және түрлі қаржы операцияларын жүргізу туралы құпия ақпаратты қамтитын ақпараттық жүйелерді қорғауды күшейту қажеттілігі артып келеді.

Осыған байланысты, Қазақстан Республикасы Қаржы нарығын реттеу және дамыту агенттігі (бұдан әрі - Агенттік) «Қазақстан Республикасының кейбір нормативтік құқықтық актілеріне қаржы нарығындағы ақпараттық қауіпсіздікті реттеу мәселелері бойынша өзгерістер енгізу туралы» Агенттік Басқармасының 2022 жылғы 29 сәуірдегі № 30 қаулысын (бұдан әрі – Қаулы) бекітті.

Екінші деңгейдегі банктердің ақпараттық қауіпсіздігін қамтамасыз ету жөніндегі талаптарды нақтылауға және жетілдіруге қатысты өзгерістер бірқатар құжаттарға енгізілді.

Қабылданған Қаулыда екінші деңгейдегі банктердің ақпараттық қауіпсіздігін қамтамасыз ету жөніндегі анықтамалар нақтыланды және талаптар күшейтілді, сондай-ақ ақпараттық қауіпсіздікті басқару жүйесіне кіретін банк бөлімшелерінің жауапкершілік аясы неғұрлым нақты белгіленді.

Бұдан басқа, Қаулыға сәйкес екінші деңгейдегі банктермен ақпараттық қауіпсіздік оқиғалары мен оқыс оқиғалары туралы деректермен алмасу толығымен автоматтандырылған форматқа ауыстырылады.

Осы Қаулымен қабылданған өзгерістер екінші деңгейдегі банктерге ақпараттық қауіпсіздікті қамтамасыз ету бойынша қолданыстағы талаптарды күшейтеді және ақпараттық қауіпсіздіктің салалық орталығының жұмыс істеу тиімділігін арттыруға арналған.

Жобаның толық мәтіні Агенттіктің интернет-порталында және Әділет ақпараттық-құқықтық жүйесінде орналастырылған.

• 24.05.2022
• 246