ҚР Денсаулық сақтау және әлеумемттік даму министрі Т.Қ. Дүйсенованың Медицина қызметкерлері күнімен құттықтау сөзі

Құрметті әріптестер!

Сіздерді кәсіби мерекелеріңіз – Медицина қызметкерлері күнімен шын жүректен құттықтаймын! Адамдардың денсаулығын сақтау мен нығайту жолындағы еңбектеріңіз бұл күні ерекше айқындала түседі.

Адам баласы денсаулықсыз емен-жарқын өмір сүре алмайтыны белгілі, сондықтан ел сіздердің еңбектеріңізге қашанда мұқтаж. Адамның өмірге келуіне көмектесіп, денсаулығын сақтайтын кәсіп иелері қай заманда да ерекше сый-құрметке ие болған.

Екінің бірі мейіргер, фельдшер, дәрігер бола алмайды, ол үшін қабілет керек. Адам денсаулығын сақтауда көп нәрсе дәрігерлердің біліктілігі мен кәсіби деңгейіне байланысты. Қазіргі заманның өзіндік талаптары бар. Бүгінгі таңда Қазақстанда халықаралық жоғары технологиялар кеңінен енгізілуде. Соның арқасында жыл сайын 50 мыңнан астам азамат шетелдерге шықпай-ақ, өз елімізде жоғары мамандандырылған медициналық көмек алуда. 2014 жылдың өзінде 200-ден аса органдарды транплантациялау оталары жасалды.

Жоғары технологиялық операциялардың 50% жуығы өңірлік клиникаларда атқарылады. Республикада жүректің қан тамырларын стендтеу оталары 2010 жылы ғылыми орталықтар мен институттарда ғана жасалса, бүгінгі таңда аталған технология өңірлерге тарап, жыл сайын 10 мыңнан астам адамның өмірін құтқаруда.

Медицинадағы осындай ауыз толтырып айтуға болатын жетістіктердің артында дәрігерлер мен олардың көмекшілері – орта және кіші медицина қызметкерлері тұр. Олар үшін ең бастысы – науқастың мүддесі.

Сіздердің еңбектеріңіз шын мәнінде адамгершілікті іс – адамдардың денсаулығын сақтап, өмірге сүруге үміт сыйлайсыздар.

Мемлекет басшысы алдымызға әлемнің бәсекеге қабілетті 30 елінің қатарына кіру туралы тапсырма қойды, яғни экономиканың өзге секторларымен бірге денсаулық сақтау да саласы әрі қарай дами беруі тиіс.

Қазақстан дәрігерлері бұл міндетті абыроймен атқаратынына сенімім мол.

Сіздерге ауыр да абыройлы кәсіптің шыңына жетуге тілектестік білдіремін. Адам өміріне араша түсіп, денсаулығын сақтау жолындағы қызметтеріңіз үшін алғыс айтамын.

ҚР Денсаулық сақтау және

әлеуметтік даму министрі Тамара Дүйсенова

• 17.06.2015
• 15352