ЗИЯЛЫ ҚАУЫММЕН ЖҮЗДЕСУ ӨТТІ

Жуырда елімізде референдум өтеді. Бұл айтулы саяси оқиға қоғамда кеңінен талқыланып жатыр. Түркістанға арнайы келген Парламент Сенатының төрағасы Мәулен Әшімбаевпен бірге өңірдің зиялы қауым өкілдерімен, тарихшылармен, ғалымдармен жүздесіп, референдумда Ата Заңға енетін өзгерістерді жан-жақты сараладық.

         Кездесу алдында саяси қуғын-сүргін және ашаршылық құрбандары күніне орай, Қожа Ахмет Ясауи кесенесіне барып, өткен ғасырдағы зұлматтан қаза тапқан қандастарымыз бен ұлт қайраткерлерінің рухына құран бағыштаған болатынбыз.

         «Farab»  кітапханасында өткен алқалы жиында Мәулен Әшімбаев алда келе жатқан саяси науқанның маңыздылығына тоқталып, Ата Заңға енгізілетін өзгерістер мемлекеттіліктің жаңа моделін қалыптастыратынын жеткізді. Сонымен бірге Сенат төрағасы Президент Қасым-Жомарт Тоқаевтың тапсырмасымен еліміздегі саяси қуғын-сүргін құрбандарын толық ақтау және зерттеу үшін арнайы мемлекеттік комиссия құрылғанына тоқталды. Сенат бастамасымен  былтыр құнды деректерден тұратын 5 томдық ғылыми  еңбек жарық көрді.

Кездесуде осы және өзге де мәселелер қозғалып, зиялы қауымның ұсыныстары тыңдалды. Жалпы референдумге Түркістан жұртшылығының ықыласы жоғары. Бұл – Жаңа Қазақстанды құрудағы маңызды қадам!

• 01.06.2022
• 244