Бүгін Атырау облысының Исатай және Құрманғазы аудандарының тұрғындарымен тағы бір мәрте кездестім

Бүгін Атырау облысының Исатай және Құрманғазы аудандарының тұрғындарымен тағы бір мәрте кездестім. Аймақтағы қордаланған мәселелерді талқылап, жол жөндеу жұмыстарының барысы туралы әңгімелестік. Сондай-ақ жергілікті тұрғындардың талап-тілегін тыңдадым. Құрманғазы ауылының (Ганюшкино) тұрғындары біз бұған дейін келіп кеткен соң жолдардағы жөндеу жұмыстарында құрылысшылар мен техника санының артқанын айтып, қозғалыс басталғаны мені де қуантып тастады. Естеріңізде болса, Атырау облысына айына бір рет міндетті түрде келуге уәде берген болатынмын. Басты мақсатым – өңірде жүргізіліп жатқан жұмыстардың сапасы мен оның орындалу мерзімін жіті қадағалау. Өткен жолы Атыраудан келсем, бұл жолы Орал арқылы жол түсті. Сапар барысында бірқатар құрылыс нысандарында болып, «Атырау-Астрахань» сияқты ірі көлік дәлізінде жөндеу жұмыстарын жүргізіп жатқан мердігер компания өкілдерімен кездестім. Әңгіме барысында мердігерлерге “қатты” айтуға да тура келді. Әсіресе, әңгіме жол құрылысы мен сапасы турасында болғанда. Жергілікті тұрғындар қиналып, осы жолдың біткенін күтіп отырғанын айттым. Тіпті, “сөздеріңде тұрмасаңдар, айтқан уәделеріңді орындамасаңдар, заң алдында жауап бересіңдер” дедім. Сондай-ақ, жол жөндеу учаскелерінде күн-түн демей “қара” жұмыс жасап жатқан бауырларымыздың арқаларынан қағып қойып, күш-қуат тіледім. Сөзімді түйіндей келе, көлік жолдарының ахуалына ерекше назар аударатынымызды айтқым келеді. Атқарылып жатқан жұмыстарды тұрақты түрде әрдайым өз бақылауымда ұстап отырамын.

• 04.06.2022
• 309