Қазығұрттық тұрғындармен кездестім

Кестеге сәйкес Қазығұрт ауданына барып, тұрғындармен кездестім. Қазығұрт ауданынында 700-ге жуық тұрғынға кезек бойынша үй салуға жер телімі беріледі. Қазіргі таңда жоспарлау, инфрақұрылымын тарту жұмыстары жүргізіліп жатыр. Елге осы ақпаратты жеткіздім. Ұсыныстары мен өтініштерін тыңдадым.

«Халық үніне құлақ асатын мемлекет» тұжырымдамасына сай осындай кездесулерден кейін тұрғындардың ұсыныстары мен тілектері де негізге алынып, тиісті жұмыс жүргізіледі. Бүгінде Түркістан қаласын дамыту бағытында қарқынды жұмыс жүруде. Үйлердің 90 пайызына газ кірді, ағын су және ауыз су мәселесі шешілді. Қала бірнеше бағытта дамып жатыр. Облыстың аудан, қалаларын өркендету назарда тұр. Ең бірінші мәселе – шағын кәсіпкерлікті дамыту. Біз әр ауданнан жастарды бейімдеп, кәсіпкерлер шығаруымыз керек. Кездесуде тұрғындар үй салуға жер учаскесін беру, Алтынтөбе ауылдық округіндегі жер дауы, Шанақтағы жол мәселесі, Үшбұлақтағы ауыз су мәселесі, Қақпақ ауылындағы жол мәселесі, Қазығұрт ауылындағы ауыз су сапасын жақсарту мәселесін және өзге де өтініштер мен ұсыныстарын жеткізді. Сұрақтарға жауап беріп, мәселелер хаттамаға енгізілді.

2021 жылы Қазығұрт ауданында өнеркәсіп өнімінің көлемі – 12,6 млрд. теңгені, инвестиция көлемі – 18,4 млрд. теңгені,  ауыл шаруашылығы өнімінің көлемі 10,4 млрд. теңгені құрады. «Бір алқаптан 2-3 өнім алу» жобасы бойынша 170 гектар жерде 122 жоба іске асырылып, бірінші өнім жинау күтілуде. Былтыр 25 808 шаршы метр тұрғын үй берілді. «Ауыл – Ел бесігі» жобасы аясында 2021 жылы 8 елді мекенде 26 жоба іске асырылды. 

• 08.06.2022
• 405