Сақтандыру нарығын, бағалы қағаздар нарығын дамыту және банк қызметі бойынша заң жобасы

ҚР Қаржы нарығын реттеу және дамыту агенттігі «Қазақстан Республикасының кейбір заңнамалық актілеріне сақтандыру нарығын және бағалы қағаздар нарығын реттеу мен дамыту, банк қызметі мәселелері бойынша өзгерістер мен толықтырулар енгізу туралы» заң жобасын әзірледі.

Заң жобасының негізгі мақсаты сақтандыру нарығын және бағалы қағаздар нарығын одан әрі дамыту болып табылады. Ол үшін жаңа өнімдерді енгізу, қызметтерді цифрландыру, тұтынушылар мен инвесторлардың құқығын қорғау,  заңнаманы үздік халықаралық практикаға сәйкес келтіру талап етіледі.

Заң жобасында 5 кодекске және 35 заңға өзгерістер енгізу көзделеді.

Заң жобасының бірінші блогы сақтандыру секторын кешенді дамытуға бағытталған.

Оған Мемлекеттік білім беру жинақтаушы жүйесі шеңберінде өмірді жинақтаушы сақтандыру және бірлескен (ерлі-зайыпты) зейнетақы аннуитеті сияқты өмірді сақтандырудың жаңа әлеуметтік маңызды өнімдері кіреді. Сонымен бірге, онда цифрландыруды дамыту, сақтандыру жағдайын онлайн-реттеуді және икемді тарифтеу тетігін енгізу көзделеді. Заң жобасында кепілдік берілетін сақтандыру сыныптарының тізбесі кеңейтіледі.

Заңнамалық бастамалардың екінші блогы Қазақстанның қор нарығын одан әрі дамытуға бағытталған.

Заң жобасына сәйкес, тек лицензиясы бар брокерлер мен дилерлер инвестициялық консультация беріп, делдалдық қызметтер  көрсете алатын болады.

 Қазақстандық брокерлер үшін  клиенттің инвестициялық бейінін міндетті бағалау туралы талап енгізіледі. Сондай-ақ заң жобасы Қазақстанның компанияларында корпоративтік басқару жүйесін жетілдіруге және «жасыл қаржыландыру» қағидаттарын дамытуға бағытталған.

Заң жобасы түзетулерінің үшінші блогы банк қызметін жетілдіруді көздейді.

Онда лицензия тапсырмай ірі микроқаржы ұйымдарын банктерге айналдырудың жаңа тетігі, сондай-ақ екінші деңгейдегі банктер және банк холдингтері үшін қаржылық емес ұйымдарға инвестициялау мүмкіндігі көзделеді.

Микроқаржы ұйымдары қарыз алушыларының борыш жүктемесін қысқарту үшін Заң жобасында микрокредит бойынша артық төлем мөлшерін екі есе қысқарту, яғни микрокредит сомасынан 100%-дан 50%-ға дейін қысқарту арқылы қарыз алушылардың борыш жүктемесін шектеу ұсынылады.

Жалпы алғанда, заң жобасы сақтандыру, банктік және қор нарықтарының серпінді өсуі арқылы экономиканы дамытуға және азаматтардың әл-ауқатын арттыруға мүмкіндік береді.

Заң жобасын қабылдау үшін мемлекеттік бюджеттен қосымша қаржы шығындары талап етілмейді. 

Барлық заңнамалық бастамалар туралы мына жерден оқуға болады: https://www.gov.kz/memleket/entities/ardfm/press/news/details/386003?lang=ru

• 13.06.2022
• 298