Проблемалық берешекті реттеу тетігіне қатысты

ҚР Қаржы нарығын реттеу және дамыту агенттігі 2021 жылғы мамырда кейбір заңнамалық актілерге өзгерістер мен толықтырулардың енгізілгенін еске салады, оларға сәйкес 2021 жылғы 1 қазаннан бастап Қазақстанда кредиттік ұйымдардың қарыз алушы - жеке тұлғалардың проблемалық берешегін реттеудің бірыңғай құқықтық режимі қолданылады.

Мерзімі өткен берешегі бар қарыз алушы  - жеке тұлғалар өз кредиттерін немесе микроқарыздарын қайта құрылымдау жөніндегі мәселелерді құқықтық ая шеңберінде азаматтардың өтініштерін қарау міндеті жүктелген кредиторлармен тікелей шеше алады.

Мерзімі өткен берешек туындаған жағдайда, кредитті қайта құрылымдау үшін қарыз алушы жазбаша өтінішпен не шартта жазылған өзге де тәсілмен бірінші кезекте кредиторға жүгінуі қажет.

Өзінің өтінішінде қарыз алушы өз міндеттемелерін орындамауының себебін көрсетуі керек. Кредитті төлеуге қатысты туындаған қиындықтарды растайтын құжаттар болуға тиіс. Сонымен бірге, тұтынушылар міндеттемелерді орындауға қатысты өз нұсқаларын ұсына алады. Бұл сыйақы мөлшерлемесін азайту, төлемді кейінге қалдыру, шарттың қолданыс мерзімін, өтеу әдісін өзгерту, өзінің қаржылық жағдайын ескере отырып жаңа өтеу кестесін жасау немесе кепілдегі мүлікті дербес түрде өткізу болуы мүмкін.

 Егер қаржылық қызметтерді тұтынушы кредитормен келісімге келе алмаса, онда ол Агенттікке жүгінуге құқылы. Бұл ретте кредиттік ұйымға жүгінгені және өзара қолайлы шешімге келмегені туралы растаманы міндетті түрде ұсыну қажет.

Өтінішті жазбаша түрде не болмаса «e-Otinish» ресми өтініштер беру сервисі арқылы беруге болады. Агенттіктің әлеуметтік желілері, электрондық поштасы және мессенджерлері өтініштерді қабылдайтын ресми арна болып табылмайды.

Өтініш берген кезде міндетті түрде ЖСН, өтініш мәнін көрсету, ілеспе және растайтын құжаттарды қоса тіркеу қажет. Мұндай ақпараты жоқ өтініштер, сондай-ақ өтініш берушіні идентификаттау мүмкін емес өтініштер қарастырылмайды.

Аталған бірыңғай құқықтық режим қарыз алушыда қиындықтар туындаған бастапқы кезеңдерде берешегін реттеуге мүмкіндік береді, бұл өз кезегінде борыш жүктемесін азайтуға және оның қаржылық жағдайының нашарлауын болдырмауға көмектеседі.

Бірыңғай құқықтық режим қолданылғаннан бастап 25 979 қарыз алушы өз қарыздарының талаптарын жақсару жағына қарай өзгертті. Мәселен, 23 788 шарт бойынша негізгі борыш немесе сыйақы бойынша төлем мерзімі кейінге қалдырылды, 16 413 шарт бойынша қарыз мерзімі өзгертілді. Бұдан басқа, 861 қарыз бойынша сыйақы мөлшерлемесі азайтылды, ішкі қайта қаржыландыру ұсынылды немесе өтеу әдісі өзгертілді.

• 15.06.2022
• 268