Түркістан өңірінің болашағы жарқын

Бүгін Орталық коммуникациялар қызметінде Түркістан облысының дамуы туралы баяндап, журналистердің сұрақтарына жауап бердім. Екі сағатқа жуық кездесуде өзекті мәселелердің басым бөлігі талқыланды, өткір сұрақтар қойылды.

Түркістан облысының құрылғанына биыл 4 жыл уақыт болды. Осы төрт жылда облыстың әлеуметтік-экономикалық дамуының оң үрдісі айқын аңғарылады. Атап айтқанда, жалпы өңірлік өнім көлемі 1,6 есе артып, 2,8 трлн. теңгеге жетті. Өнеркәсіп өнім көлемі 1,6 есеге артып, 707,8 млрд. теңгеге жетсе, ауыл шаруашылығы өнімі 1,7 есеге артып, 906,5 млрд. теңгені құрады. Былтыр 823,8 мың шаршы метр тұрғын үй пайдалануға берілді. Облыс бюджетінің көлемі 1,7 есеге артып, 970,3 млрд. теңгені құрады. Атқарылған жүйелі жұмыстардың нәтижесінде биылғы 5 айда оң өсім сақталды.

Өңір халқының кәсіпкерлікке деген ықыласы жақсы. «Қарапайым заттар экономикасы» бағдарламасын жүзеге асыру көрсеткіші бойынша Түркістан облысы республикада бірінші орында. Шағын және орта бизнесті қолдау шараларының арқасында өндірілген өнім көлемі 47%-ға өсіп, 1,2 трлн. теңгені құрады. Облыста инвестиция көлемі де ұлғайған. Негізгі капиталға бағытталған инвестициялар көлемі 2021 жылдың қорытындысымен 2,3 есеге артып, 660,3 млрд. теңгені құрады.

Ауыл шаруашылығы саласында  өңірде өткен жылы 5 айда 170,3 млрд. теңгенің өнімі өндірілсе, биыл жаңбырлатып және тамшылатып суғару, өзге де жаңа технологияларды батыл енгізудің арқасында 199,3 млрд. теңгенің өнімі өндірілді. Нәтижесінде су үнемделіп, өнімділік еселеп артқан.

Өңірде құрылыс қарқыны арқан. 2022 жылдың басынан бері пайдалануға берілген тұрғын үйдің жалпы алаңы 191,5 мың шаршы метр. Облыста тұрғын үйді пайдалануға тапсыру жоспары 855 мың шаршы метр болып белгіленді.

Брифингте Президент Қасым-Жомарт Тоқевтың тапсырмалары аясында атқарылып жатқан жұмыстарды, өңірдің әлеуметтік-экономикалық дамуын, Түркістан қаласын дамыту бағытындағы жұмыстарды кеңінен баяндап, жоспарлармен бөлістім.

Менің ойымша Түркістан өңірінің әлеуеті өте жоғары. Түркістан қаласының Орта Азияның жауһарына айналарына сенемін. Бұл үрдіс басталып та кетті. Шаһар гүлденді.

Елдің, өңірдің өмір сапасын жоғарылату бағытында жүйелі жұмыс жалғасын табады. Түркістан өңірінің еңбекқор жұртшылығымен бірге биік белестерді бағындыра берерімізге сенімдімін.

• 15.06.2022
• 370