Нұр-Сұлтанда биыл емдеу-оңалту орталығы мен емхана ашылады

Жыл сайын әлеуметтік нысандар құрылысының көлемін арттырып келеміз. Елордамыз бен тұрғындарымыз үшін маңызды саналатын нысандардың құрылысына жеке инвестицияларды тартамыз. Қаланы аралау кезінде емхана мен емдеу-оңалту орталығынан құралған медициналық мекеме құрылысының барысымен таныстым. Бұл медициналық орталықтың құрылысына жеке инвестициялар тартылды.

Бұл медициналық орталықтың ерекшелігі – амбулаториялық және стационарлық көмектен бөлек, бойында түрлі аурулары бар адамдар үшін оңалту қызметтері де көрсетіледі. Осы мақсатта мұнда бассейн де салынды.

Жаңа медициналық орталық тұрғындары көп Алматы ауданында (Қ.Әзірбаев және А. Бөлекпаев көшелерінің қиылысы) орналасқан. Медициналық орталықтың аумағы – 10 мың шаршы метр, әр ауысымда 500-ден астам пациентті қабылдай алады. Аталмыш медициналық орталықты биыл ашу жоспарланып отыр.

Емхана мен емдеу-оңалту орталығын салуға және оның ішін жарақтандыруға 4,5 млрд теңге жеке инвестиция жұмсалады. Қала тұрғындарын медициналық көмекпен көбірек қамту үшін жеке медициналық орталықтарға субсидия бөлетін боламыз.

Мемлекет басшысының тапсырмасы бойынша медициналық орталықтардың «Үйдегі дәрігер» желісін кеңейту, медициналық мекемелерді қажет жабдықтармен толық қамтамасыз ету, күрделі жөндеу жұмыстары жүріп жатыр.

• 16.06.2022
• 359