Түркістанға Маңғыстаудан өнер, руханият керуені келді

Түркістан қаласында Маңғыстау облысының «Маңғыстаудан мың сәлем, Түркі төрі!» атты мәдени күндері басталды. Осыған дейін шаһарымызға Жамбыл, Ақтөбе облыстарының өнер майталмандары келіп өнерлерін паш еткен болатын. Екі күнге созылатын іс-шараның алғашқы күні «Түркістан облысына Маңғыстаудан тарту» кіші архитектуралық ескерткішінің ашылу салтанаты өтті. Маңғыстаулық бауырларымызды қуана қарсы алып, игі бастамаға қолдау білдірдік.

Қазақ хандығының астанасы, күллі Түркі халықтары тәу етер қасиетті мекен соңғы төрт жылда дамудың жаңа белесіне көтерілді. Рухани шаһардағы оңды өзгерістер қаланы тек облыс орталығы ғана емес, Түркі жұртының рухани-мәдени орталығы ретінде дамытудың алғышарты болып отыр. Бүгін осы қасиетті өңірге қазақ даласына абыз-әулиелер сыйлаған, тарихы терең Маңғыстау өңірінен бір топ руханият өкілдері келіп отыр. Бұл – қос өңірдің бағзыдан қалыптасқан рухани үндестігін қайта жаңғыртып, барлық бағыттағы қатынастарды нығайтудың айқын көрінісі деп білемін. Маңғыстаулық өнерпаздар, түрлі сала өкілдері екі күн бойы өңір жұртшылығы үшін мәдени  және маңызы зор қоғамдық шаралар ұйымдастырып, рухани кештер сыйламақ. Сонымен қатар Маңғыстау облысының күндері аясында спорттық командалардың кездесулері, ғылыми конференциялар өтіп, қос облысқа ортақ жобалардың жай-күйі талқыланады.

Осындай ауқымды, рухани азық алатын іс-шаралар Түркі жұртының рухани бойтұмарына айналған Түркістан қаласында жалғаса бермек. Баршаңызды маңғыстаулық ағайындардың мәдени күндеріне, рухани іс-шараларына шақырамыз.

• 16.06.2022
• 372