Арыста даму бар

Тұрғындармен кезекті кездесуім Арыс қаласында жалғасты. Елдің талап-тілектерін тыңдап, мүмкіндігінше, көтерілген мәселелерді заң аясында шешуге тырысатынымды жеткіздім. 

Арыс қаласында салынған бірнеше өндіріс орнын араладым. Сондай-ақ «Арыс-Шардара» тас жолының жиегінде бой көтерген ипподромды көрдім. Атшабар аумағында жеке инвесторлар есебінен қала тұрғындары мен қонақтарына арнап иппотерапия қызметі ұсынылуда. Сондай-ақ бұл жерде көкпар, бәйге, жамбы ату, теңге ілу, саятшылық, аударыспақ, асық ату сынды ұлттық ойындарды дамытуға жағдай жасалған.

Теміржолшылар қаласының даму деңгейі тәуір. Арыста инвестиция үш есеге өскен. Жайылымдық жер 31 мың гектарға кеңейтілді. Жыл соңына дейін 400-ге жуық адамды жұмыспен қамту жоспарланған. 

 Арысқа іссапар барысында мемлекеттік қайтарымсыз грант арқылы өз кәсібін ашқан кәсіпкерлермен кездестім. Биыл «2021-2025 жылдарға арналған кәсіпкерлікті дамыту жөніндегі ұлттық жоба» аясында жаңа бизнес-идеяларды іске асыру үшін 25 азамат 1225 200 теңге грантқа ие болды.

Жалпы жақында Президент Үндеуінде айтылған тапсырмалар мен айқындалған міндеттер еліміздің экономикалық өсімін жеделдетіп, халықтың өмір сүру сапасы мен әл-ауқатын жақсартуда маңызды рөл атқаратыны сөзсіз. Реформаларды арыстықтар қолдап отыр.

• 21.06.2022
• 399