Жаз маусымы басталғалы бері теміржол және авиа тасымалдау қызметтерінің жұмысына қатысты сын-пікірлер жиілеп кетті

Жаз маусымы басталғалы бері теміржол және авиа тасымалдау қызметтерінің жұмысына қатысты сын-пікірлер жиілеп кетті. Қазақстандықтар билеттердің қымбаттауы, пойыздар мен ұшақтардың кешігуі, вагондардың, вокзалдар мен әуежайлардың жай-күйіне наразы. 

Ақпарат алаңында жүрген журналистермен жақында кездескен болатынбыз. Кездесу барысында да осы тақырыпты талқыладық. Сөз кезегінде Әселім Әбілдинова, Айнұр Коскина, Денис Кривошеев және басқа да журналист іні-қарындастарым көпшілікті толғандырып жүрген мәселелерді көтерді. Көптің көкейінде жүрген сауалдарға жақын арада жауап берілетінін айттым. 

Ендігі кезекте ертең, 30 маусым күні (елорда уақытымен сағат 15.00-де) Орталық коммуникациялар қызметі алаңында баспасөз конференциясы өтетінін мәлімдеймін. Жиынға көлік және азаматтық авиация комитеттерінің өкілдері ғана емес, сондай-ақ ҚТЖ, теміржол тасымалдаушылары мен авиакомпаниялардың басшылығы да қатысады. 

Осы ретте журналистер баспасөз мәслихатына қатысып, белгілі бір тақырып аясында сұрақтарына жауап ала алады. 

Баспасөз жиыны Орталық коммуникациялар қызметінің Facebook-тегі парақшасында және YouTube арнасында тікелей эфирде көрсетіледі.

• 30.06.2022
• 324