Бүгін Үкімет отырысында тұрғын үй саясатындағы жаңа тәсілдерді іске асыру бойынша жүргізіліп жатқан жұмыстар туралы баяндама жасадым

Бүгін Үкімет отырысында тұрғын үй саясатындағы жаңа тәсілдерді іске асыру бойынша жүргізіліп жатқан жұмыстар туралы баяндама жасадым. 

Индустрия және инфрақұрылымдық даму министрлігі тұрғын үй саясатын реформалау мәселелері бойынша заң жобасын әзірлеген болатын. Негізгі жаңашылдық – Отбасы банкін Ұлттық даму институты етіп трансформациялау және аталған институт базасында «Тұрғын үймен қамтамасыз ету орталығын» құру. Бұл жаңа модель халықты тұрғын үймен қамту тиімділігін арттыруға және тұрғын үйлерді әділ бөлудің бірыңғай жүйесін енгізуге мүмкіндік бермек. 

Сөз кезегінде Әлихан Асханұлы еліміз бойынша құрылыс саласында оң динамика қалыптасып отырғанын атап өтті. Шын мәнінде, биыл 5 айдың ішінде 4,7 млн шаршы метр пайдалануға беріліп, 39 мың отбасы баспаналы болды. Мемлекет басшысы Қасым-Жомарт Тоқаевтың тапсырмасы бойынша әзірленген жалдамалы тұрғын үйді субсидиялау бағдарламасы да нәтижелі жүзеге асырылып жатыр.

Премьер-Министр тұрғын үй саясатына енгізіліп жатқан жаңашылдықтардың барлығы тиімді, уақытылы әрі сапалы іске асырылуы тиіс екендігіне баса назар аударды. Әлбетте, баспанаға мұқтаж адамдарды тұрғын үймен қамту мәселесі аса маңызды міндет. Аталған бағыттағы жұмыстар жалғасатын болады.

 Келесі қаралған маңызды мәселе — көлік және құрылыс саласында мүмкіндігі шектеулі жандарға жағдай жасау төңірегінде болды. Осы ретте, мүмкіндігі шектеулі жолаушыларға қызмет көрсетуде дайындығы барынша жоғары азаматтық авиация саласындағы инфрақұрылым екенін айтып өткім келеді. Теміржол көлігі саласында жылдың соңына дейін мамандандырылған вагондардың тапшылығын толығымен жоюды жоспарлап отырмыз. 

Жалпы мүмкіндігі шектеулі жандарды қолайлы ортамен қамтамасыз ету мәселесі ұдайы бақылауымызда.

• 05.07.2022
• 428