Түркістан төрінде ауқымды баспасөз конференциясын өткізу – біз үшін үлкен мәртебе

Құрметті жерлестер! Көптен бері әлеуметтік желіге кіруге мүмкіндік болмай кетті. Ол үшін кешірім сұраймын. Бүгін айтулы күн болды.
Түркістан төрінде ауқымды баспасөз конференциясын өткізу – біз үшін үлкен мәртебе. ҚР Президенті жанындағы Орталық Коммуникациялар қызметі алаңында ұйымдастырылған «Мемлекет басшысының Жолдауы аясында Түркістан облысының аумақтық дамуы туралы» тақырыбында баяндама оқып, тұрғындарға кеңінен мәлімет бердім деп ойлаймын. Өңірдің биылғы жылғы 10 айда жеткен жетістіктерін атап өтіп, облыста жүзеге асып жатқан «Азық-түлік» белдеуі, «Бір алқаптан жылына 2-3 өнім алу» жобасы, Мақтаарал ауданындағы техногендік апат салдарын жою, Түркістан қаласының дамуы және оның түркі жұртының рухани астанасы ретіндегі маңызына тоқталдым. Эфирден көргендеріңіздей, журналистер өздерін толғандырған сауалдарын қойып, толыққанды жауап ала алды. 
Биылғы жыл бәріміз үшін үлкен сынақтарға толы жыл болды. Коронавирус пандемиясы өмір сүрудің мәнін өзгертіп, бұрыннан қалыптасқан режимді бұзуға мәжбүр етті. Құндылықтар мен басымдықтар өзгерді, көптеген мәселелерге басқаша көзқараспен қарайтын болдық. Бұл кезең, біздің басты құндылығымыз - адам өмірі мен денсаулығы екенін айқын дәлелдеді. 
Болжамға сай, індеттің екінші толқыны өткен жағдайда облыстың медициналық ұйымдарын дәрілік заттар мен арнайы қорғаныш құралдарымен қамтамасыз ету мақсатында жалпы 2 млрд. теңгеден астам қаражат бөлінді. Бұл сомаға 361,8 млн. теңгеге дәрілік заттар, 1,6 млрд. теңгеге медициналық бұйымдар, 185 млн. теңгеге дезинфекциялық ерітінділер алынды. Дәрі-дәрмектің 2 айлық қор резерві жасақталды. 
Өкпені жасанды желдету (ИВЛ) аппараттарының саны 337-ге артып, оттегі станциясының 8-ге жетті. 
Сондай-ақ, 80 бірлік оксигенация аппараты, 890 оттегі концентраторына қол жеткіздік. Сондай-ақ, биыл облыстық бюджет есебінен 1 дана компьютерлік томограф пен 3 дана сандық рентген аппараттары орнатылды. Жедел-жәрдем қызметіне арнайы қосымша 122 автокөлік алу жоспарда бар. 
Бұл медициналық құрал-жабдықтардың барлығы адам өмірін сақтауға, тұрғындарға дер кезінде дәрігер көмегін алуға мүмкіндік береді. Орайы келгенде, облыс тұрғындарына қоғамдық орындарда бетперде тағып, әлеуметтік қашықтықты сақтауға, жиын-тойды өткізуден бас тартып, сабыр сақтауға шақырамын!

• 17.11.2020
• 493