Т. Дүйсенова Жамбыл облысына жұмыс сапары барысында өңір активімен кездесті

ҚР Еңбек және халықты әлеуметтік қорғау министрі Тамара Дүйсенова Жамбыл облысына жұмыс сапары барысында өңір активімен кездесу өткізді. Министр халықты жұмыспен қамту шаралары жөнінде айтып, жергілікті атқарушы орган өкілдерін жұмыссыздық деңгейін назарда ұстауға шақырды.

Кездесуге Жамбыл облысының әкімі Нұржан Нұржігітов, облыстық мәслихат пен жергілікті атқарушы орган өкілдері, аудан әкімдері қатысты.

Тамара Дүйсенова өз сөзінде қазір еңбек нарығында болып жатқан өзгерістер туралы айтты. Ұлттық статистика бюросының ақпаратына сәйкес, Жамбыл облысында жалдамалы жұмысшылардың саны 1,2 мыңға көбейген. Ал өзін-өзі жұмыспен қамтығандар саны 2,3 мың адамға азайған. Жұмыссыздық деңгейі – 5,1%, жастар арасындағы жұмыссыздық деңгейі – 3,1%.

Жамбыл облысында 15-28 жас аралығындағы жастардың саны – 221 мың. Бұл облыс халқының 19%-ы. Осыған орай министр жастарды жұмыспен қамтудың маңызына тоқталды.

«Жамбыл облысындағы жастардың саны 2030 жылға қарай 64 мың адамға көбейіп, 286 мыңға жетеді. Ал 2040 жылға қарай бұл көрсеткіш тағы 100 мыңға артады. Экономикалық белсенді жастардың саны 2030 жылға қарай 149 мыңға дейін көбейіп, еңбек нарығына күш түсіретіні анық. Мектептегі біліммен қалған жастардың үлесі - 18%, ал жоғары білімі жастардың үлесі - 39%. Өңірде жұмыспен қамтылған 157 мың жастың 101 мыңы – жалдамалы жұмысшылар», - деді Тамара Дүйсенова.

Министр биылғы 6 айда облыста 27 мыңнан астам адамның жұмысқа орналасқанын атап өтті. Оның басым көпшілігі – 17 мыңнан астам азамат жұмыспен қамту орталықтары арқылы жұмысқа тұрған.

«Ұлттық жобалар аясында ашылып жатқан тұрақты жұмыс орындарының көрсеткіші төмен. Жамбыл, Жуалы, Тұрар Рысқұлов, Мойынқұм аудандарында бұл жұмыс мүлде жүргізілмеген. Сарысу ауданында тек 9 адам ғана Ұлттық жобалар аясында жұмыспен қамтылған.

Мониторинг жүргізу тәртібіне сай, жұмысқа тұрған азаматтар міндетті зейнетақы жарналарымен, жеке табыс салығының бар-жоғымен расталады. Жамбыл облысында бұл көрсеткіш 48% болып отыр. Облыс деңгейінде ең төменгі көрсеткіш Жамбыл және Сарысу аудандарында тіркелген», - деді министр.

Тамара Дүйсенова Жамбыл облысының өңірлік картасында көзделген 4 576 тұрақты жұмыс орнының биылғы жарты жылда 433-нің ғана ашылғанын атап өтті. Ал осы өңірлік картада көзделген 235 Ұлттық жобаның 123-і ғана Электронды еңбек биржасына енгізілген.

«Электронды еңбек биржасына енгізілген Ұлттық жобалар аясында жарияланған жұмыс орындарының талдау нәтижелері: Жамбыл облысы бойынша жарияланған 1 999 орынның 520-на белгілі бір біліктілік талаптары қойылған, ал 1 479-на талап жоқ. Осы жұмыс орындарына жіберуге болатын жұмыссыздардың да сапасын қарадық. Жамбыл облысында жұмыссыз ретінде тіркелген 4816 жұмыссыз адамның 2526-нің біліктілігі бар, ал 2290 адамның біліктілігі жоқ.

Жамбыл облысында бос жұмыс орындары жеткілікті екенін Электронды еңбек биржасындағы осы мысалдардан көруге болады. Жұмыссыз қалып жатқан азаматтарға қолдау көрсетіп, қажетті жұмыс орындарына орналасуға барынша қолдау көрсету барлығымыздың міндетіміз екенін ұмытпағанымыз жөн», – деді министр.

Өңір активімен кездесуде қазақстандықтарды зейнетақымен қамту, әлеуметтік қолдау шаралары, мүгедектігі бар адамдарды қолдау шаралары да талқыланды.

• 21.07.2022
• 233