Т. Дүйсенова «Жамбыл облысы тұрғындарының тұрмыстық табысын арттыру» пилоттық жобасының жұмысымен танысты

ҚР Еңбек және xалықты әлеуметтік қорғау министрі Тамара Дүйсенова Жамбыл облысына жұмыс сапары аясында «Тараз» әлеуметтік-кәсіпкерлік корпорациясына барды. Онда министр корпорация жүргізіп жатқан жұмыс бағыттарымен және облыс тұрғындарының тұрмыстық табысын арттыру пилоттық жобасының жұмысымен танысты.

Еңбек және халықты әлеуметтік қорғау министріне «Жамбыл облысы тұрғындарының тұрмыстық табысын арттыру» пилоттық жобасын таныстыру барысында облыс әкімі Нұржан Нұржігітов 2019 жылы бастау алған жоба алдағы уақытта жалғасатынын айтты. Өңір басшысы бұл тәжірибені республика бойынша тарату ісі қолға алынғанын атап өтті. Жоба үй іргесіндегі жерді тиімді пайдалану, мал шаруашылығын дамыту, ауыл сыртындағы жер үлесін тиімді пайдалану, кооперативтерді жабдықтау, тұрғындардың өз кәсібін ашуы сияқты бес бағыт бойынша жүзеге асады.

«Ұсынысымыз Үкіметтен қолдау тапты. Бізде бұл жобаны ары қарай нәтижелі жүзеге асыру үшін тиісті кадрлар да, тәжірибе де жеткілікті. Жобаның бірінші кезеңінде өңірдегі 11 ауылдық округке қарасты 25 елді мекендегі 7 856 отбасы қамтылды. Бұл мақсатта жалпы 9,2 млрд. теңге несие қаражаты бағытталды. 2021 жылы қайтарылған несиелер есебінен 3 ауылдық округте жоба жалғасын тапты. 253 жоба іске асырылды. Жобаны іске асыру нәтижесінде төмен 2,5%-бен несие берілді және ауылдық елді мекендердегі мүліктер кепілдікке қабылданды», - деді облыс әкімі.

Сондай-ақ Тамара Дүйсенова жұмыс сапары аясында пилоттық жоба жүзеге асып жатқан Байзақ ауданындағы Қостөбе және Үлгілі ауылдарына барды. Еңбек және халықты әлеуметтік қорғау министрі микронесие алып,  мал шаруашылығы, құс шаруашылығы және ауыл шаруашылығы техникасы бойынша жобаларды жүзеге асырып отырған ауыл тұрғындарымен кездесті. 

• 22.07.2022
• 300