Түркістанда ауқымды жобалар жүзеге асып жатыр

Облыс тұрғындарымен кездесу жалғасып жатыр. Түркістан қаласы тұрғындарымен кездесіп, ұсыныс, пікірлерін тыңдадым. Наурыз айында да тұрғындарды толғандырып жүрген әлеуметтік және басқа да өзекті мәселелерді талқылаған едік. Елмен қайта жүздесіп, көтерілген мәселелердің шешілу барысын баяндадым. Жалпы Түркістан қаласы бойынша халықпен кездесу мен жеке қабылдау барысында 32 мәселе көтерілді. Оның ішінде 23-і өз шешімін тапты, қалған 9-ы шешілу үстінде. Көтерілген барлық сұрақтар біртіндеп өз шешімін табуда. Кейбір мәселелерді шешу үшін заң аясында бюджеттен қаржыны қарастыру уақытты талап етеді. Сондықтан бұл бағытта жұмыстар жүргізіліп, міндетті түрде шешімін табатын болады. 
Амфитеатрда өткен екінші кездесуде Түркістан облысын, Түркістан қаласын дамыту бағытындағы жобалармен таныстырдым. Түркістан қаласында облыстық жедел медициналық көмек станциясы шілде айында пайдалануға тапсырылды. Түркістан қаласынан Балтакөл бағытының шыға берісіндегі Жангелдин көшесін қайта құру жобасы бойынша биылғы жылға 944 млн. теңге қаржы қаралды. Нысан келер жылдың екінші тоқсанында аяқталады. Сондай-ақ Б.Саттарханов атындағы балалар мен жасөспірімдерге арналған спорт кешені орнынан қазіргі заманауи үлгідегі спорт кешенінің құрылысы жүріп жатыр. Жобаға биыл 1,7 млрд. теңге қаржы бөлінді. Нысан құрылысы 2023 жылы аяқталады. Сонымен бірге Отырар мөлтек ауданындағы 5 көпқабатты тұрғын үйлердің жан-жағын реттеу бойынша құрылыс жұмыстары басталды.  Осы және өзге жобалардың бәрі жіті бақылауда тұр. Түркістанды бәсекеге қабілетті ірі қалаға айналдыру бағытындағы жұмыс жалғаса береді.

• 25.07.2022
• 308