Бейбіт күннің батырларына құрмет көрсетілді

Қоғамды отаншыл, батыл, жанашыр адамдар гүлдендіреді. Түркістан облысында осындай қайсар жандар көп. Олар өз басына қауіп төнсе де, өзгенің өмірін құтқару үшін барын салып, ерлік жасай біледі. Ерлік жасаған 4 азаматты арнайы қабылдап, пікірлестім. Құрмет көрсетіп, «Облысқа сіңірген еңбегі үшін» медалін тапсырдым. Енді осы батырлармен таныса отырыңыздар:

Қансейіт Мұхаммед – Сайрам аудандық халықты жұмыспен қамту орталығының қызметкері. Ақсукент ауылында орналасқан әрі өзі жұмыс істейтін ғимаратта болған өрт кезінде шатыр үстіндегі Мемлекеттік Туды оттан алып шықты.

Хайруллаев Аян – Жетісай аудандық полиция бөлімінің миграция бөлімшесінің басшысы. Ол төнген қауіпке қарамай, бейтаныс кейуананы өрттің ортасынан аман алып шыққан. 

Нұрғали Керімбеков – Кентау қаласы, №12 Өрт сөндіру бөлімінің бөлімше командирі, азаматтық қорғау аға сержанты. Өз ісінің шебері су құбырына құлап кеткен 2 жастағы баланы құтқарып алды.

 Рысбек Мейірбек – Қазығұрт ауданының тұрғыны. Ол әжетханаға түсіп кеткен 1 жастағы баланы құтқарып алды.

Арыс апаты мен Мақтааралдағы су тасқынында облысымыздың ерікті жастары, патриоттары күндіз-түні елге қызмет етті. Оны ел жақсы біледі. Бұның бәрі өңір тұрғындарының мықтылығын, елге жанашырлығын көрсетті. Қабылдауда болған бейбіт күннің батырларын елдің нағыз арқасүйер азаматтары дей аламыз. Біз осындай батыл, жанашыр азаматтарды мақтан тұтамыз! Түркістан облысын дамытуда белсенді, отаншыл жандардың қосар үлесі мол.

• 25.07.2022
• 293